राष्ट्रिय स्वतन्त्र पार्टी (रास्वपा) को झन्डा राखेर चुनावी प्रचारमा हिँडिरहेको एउटा जिपबाट प्रहरीले मदिरा, चामल र खानेतेलसहितका सामान बरामद गर्दै दुईजनालाई नियन्त्रणमा लिएको छ।
सोमबार बिहान सल्यानको बन्गाड कुपिन्डे नगरपालिका–१, सल्लीबजार क्षेत्रबाट उक्त जिप नियन्त्रणमा लिइएको हो। सल्लीबजारबाट सामान बोकेर खैरागारतर्फ जाँदै गरेको कर्णाली प्रदेश ०२–००१ च ०४२९ नम्बरको जिपलाई प्रहरीले जाँच गर्ने क्रममा चालक र सवारलाई पक्राउ गरेको हो।
प्रहरीले नियन्त्रणमा लिएका व्यक्तिहरूमा सिद्धकुमाख गाउँपालिका–४ निवासी २४ वर्षीय चन्द्रप्रकाश बुढाथोकी (चालक) र ३७ वर्षीय मोहन बीसी रहेका छन्।
जिल्ला प्रहरी कार्यालय सल्यानका प्रहरी नायब उपरीक्षक हेमबहादुर केसीका अनुसार, जिपमा निर्वाचनसँग सम्बन्धित सामग्री हुनसक्ने आशंकामा जाँच गर्दा विभिन्न सामग्री बरामद गरिएको हो।
बरामद गरिएका सामग्रीमा २५ केजीका दुई बोरा चामल, ‘गोल्डेन डायमण्ड’ लेखिएको सात कार्टुन मदिरा, दुई कार्टुन रकस्टार बियर तथा तीन कार्टुन खानेतेल रहेका छन्।
यस घटनाबारे रास्वपाका नगर सभापति लोकेन्द्र ओलीले भने उक्त सामान स्थानीय व्यापारीको भएको दाबी गरेका छन्। उनका अनुसार, प्रचारप्रसारमा प्रयोग भइरहेको गाडीमा सामान राखिनु व्यापारी पक्षको गल्ती भएको बताएका छन्।
प्रहरीले घटनाबारे थप अनुसन्धान अघि बढाएको जनाएको छ।
