- • प्रतिनिधि सभा निर्वाचन २०८२ अन्तर्गत प्रत्यक्षतर्फको मतगणना सकिँदा समानुपातिकतर्फको गणना जारी छ।
- • हालसम्मको परिणामअनुसार राष्ट्रिय स्वतन्त्र पार्टीले नेपाली कांग्रेसभन्दा झन्डै तेब्बर बढी मत ल्याउँदै स्पष्ट अग्रता बनाएको छ।
- • समानुपातिक मतकै आधारमा रास्वपाले सबैभन्दा धेरै सिट थप्ने सम्भावना देखिएको छ।
२६ फागुन, विराटनगर । प्रतिनिधि सभा निर्वाचन २०८२ अन्तर्गत प्रत्यक्षतर्फको मतगणना सकिइसकेको भए पनि समानुपातिकतर्फको गणना अझै जारी रहेको छ । आज बिहान साढे ८ बजेसम्म १ करोड ३ लाख ४४ हजार ९५२ समानुपातिक मत गणना हुँदा राष्ट्रिय स्वतन्त्र पार्टीले नेपाली कांग्रेसको भन्दा झन्डै तेब्बर बढी मत ल्याएको देखिएको छ ।
प्रत्यक्षतर्फ १२५ सिट जितेको रास्वपाले बिहान साढे ८ बजेसम्म समानुपातिकतर्फ ४९ लाख ६७ हजार ४३ मत प्राप्त गरेको छ । हालसम्मको मतपरिणामलाई आधार मान्दा रास्वपाले समानुपातिक प्रणालीबाट मात्रै थप ५८ सिट हासिल गर्न सक्ने अनुमान गरिएको छ ।
यता, प्रत्यक्षतर्फ १८ सिटसहित दोस्रो स्थानमा रहेको नेपाली कांग्रेसले समानुपातिकतर्फ १६ लाख ८४ हजार १७५ मत पाएको छ । यस हिसाबले कांग्रेसले समानुपातिकबाट थप १९ सिट सुरक्षित गर्न सक्ने सम्भावना देखिएको छ ।
त्यसैगरी, प्रत्यक्षतर्फ ९ सिट जितेको नेकपा एमालेले समानुपातिकतर्फ १४ लाख २४७ मत ल्याएको छ । अहिलेको मतआधार अनुसार एमालेले थप १६ सिट प्राप्त गर्न सक्ने आकलन गरिएको छ ।
प्रत्यक्षतर्फ ७ सिट हात पारेको नेपाल कम्युनिस्ट पार्टीले समानुपातिकतर्फ ७ लाख ६१ हजार ६८० मत प्राप्त गरेको छ । यसबाट उसले थप ९ सिट पाउने सम्भावना देखिएको छ ।
चार महिना अघि मात्रै स्थापना भएको श्रम संस्कृति पार्टीले प्रत्यक्षतर्फ ३ सिट जितेको थियो । समानुपातिकतर्फ भने उसले ३ लाख ४९ हजार १४० मत प्राप्त गर्दै थ्रेसहोल्ड पार गरेको छ । यससँगै राष्ट्रिय पार्टीको मान्यता पाएको श्रम संस्कृतिले समानुपातिकबाट थप ४ सिट पाउने सम्भावना रहेको छ ।
यसैगरी, प्रत्यक्षतर्फ १ सिट जितेको राप्रपाले समानुपातिकतर्फ ३ लाख २३ हजार ५३५ मत प्राप्त गरेको छ । उसले पनि राष्ट्रिय पार्टी बन्न आवश्यक मत कटाएर समानुपातिकतर्फ थप ४ सिट जित्ने सम्भावना बनाएको छ ।
