२७ पुस, काठमाडौं — नेपाली कांग्रेस को विशेष महाधिवेशनको समर्थनमा रहेका नेता–कार्यकर्ताले उद्घाटन सत्रअघि आज काठमाडौंमा जुलुस निकाल्ने भएका छन्। महाधिवेशन आज मध्यान्ह १२ बजे भृकुटीमण्डपमा औपचारिक रूपमा सुरु हुने कार्यतालिका रहेको छ।
महाधिवेशन आयोजक समितिका अनुसार उद्घाटन समारोह सुरु हुनुअघि विभिन्न स्थानबाट जुलुस निकालेर भृकुटीमण्डपमा भेला हुने तयारी गरिएको हो। दोस्रो विशेष महाधिवेशन व्यवस्थापन सचिवालयले सबै रुटका जुलुस बिहान ११ बजे आ–आफ्ना स्थानबाट प्रस्थान गर्ने जानकारी दिएको छ।
जुलुस भृकुटीमण्डप प्रवेश गरेपछि उद्घाटन समारोह सुरु हुनेछ भने आजै बन्दसत्रसमेत आरम्भ गरिनेछ। विशेष महाधिवेशन सोमबारसम्म सञ्चालन हुने कार्यक्रम छ।
जुलुसका तय गरिएका मार्गहरू
रुट १ : सुन्धारा
सुन्धाराबाट सुरु हुने जुलुसमा चितवन, अर्घाखाँची, नवलपुर तथा सुदूरपश्चिमका विभिन्न जिल्लाबाट आएका कांग्रेस नेता–कार्यकर्ता सहभागी हुनेछन्। काठमाडौं निर्वाचन क्षेत्र ८, ९ र १० का कार्यकर्ता पनि यही समूहमा रहनेछन्। जुलुस वीर अस्पताल र पुरानो बसपार्क हुँदै भृकुटीमण्डप पुग्नेछ।
रुट २ : रत्नपार्क
रत्नपार्कबाट निस्कने जुलुसमा नुवाकोट, रसुवा, धादिङ तथा काठमाडौंको उत्तरी भेग र निर्वाचन क्षेत्र ५, ६ र ७ का नेता–कार्यकर्ताको सहभागिता रहनेछ। यो जुलुस पुरानो बसपार्क हुँदै महाधिवेशन स्थलतर्फ जानेछ।
रुट ३ : पद्मकन्या क्याम्पस
पद्मकन्या क्याम्पसबाट सुरु हुने जुलुसमा बाँके, बर्दिया, धनुषा, सप्तरी, सिरहा, महोत्तरी, सर्लाही, रौतहट, बारा र पर्साबाट आएका नेता–कार्यकर्ता सहभागी हुनेछन्। पुतलीसडक र शंकरदेव क्याम्पस हुँदै यो जुलुस भृकुटीमण्डप पुग्नेछ।
रुट ४ : शंकरदेव क्याम्पस
शंकरदेव क्याम्पस आसपास जम्मा हुने यो जुलुसमा भक्तपुर, काभ्रे, दोलखा, रामेछाप, सिन्धुपाल्चोक, सिन्धुली तथा काठमाडौं निर्वाचन क्षेत्र २ र ३ का नेता–कार्यकर्ता रहनेछन्। पुतलीसडक र पद्मोदय मोड हुँदै जुलुस भृकुटीमण्डप प्रवेश गर्नेछ।
रुट ५ : कमलपोखरी
कमलपोखरीबाट सुरु हुने जुलुसमा काठमाडौं निर्वाचन क्षेत्र १ र ४ का नेता–कार्यकर्ता सहभागी हुनेछन्। जुलुस चारखाल, डिल्लीबजार, पुतलीसडक हुँदै भृकुटीमण्डपतर्फ जानेछ।
रुट ६ : कुपण्डोल
ललितपुरको कुपण्डोलबाट निस्कने जुलुसमा ललितपुर र मकवानपुरका नेता–कार्यकर्ता सहभागी हुनेछन्। यो जुलुस थापाथली, त्रिपुरेश्वर, सुन्धारा, रत्नपार्क र पुरानो बसपार्क हुँदै भृकुटीमण्डप पुग्ने कार्यक्रम छ।
