सुन्दर र हराभरा रंगेली बनाउन नगरपालिकालाई एमालेको साथ, सडकका डिभाईडरमा ६५ हजार निल काँडको विरुवा रोप्न सुरु

रंगेली, मोरगं । मोरङको रंगेलीलाई सुन्दर, हराभरा र समृद्ध बनाउने नगरपालिकाको अभियानमा नेकपा (एमाले) ले साथ दिएको छ । रंगेली नगरपालिकाले सुरु गरेको हरित शहर अभियानमा नेकपा (एमाले) रंगेली नगर कमिटीले साथ दिएको हो । रंगेली नगरपालिकाले केही साता अघिदेखि हुलाकी राजमार्ग अन्तर्गत रंगेली क्षेत्रमा पर्ने सडकको डिभाईडरमा बृक्षारोपण गर्दै हरित शहर अभियानको सुरुवात गरेको थियो । नगरपालिकाले सुरु गरेको अभियानमा ऐक्यवद्धता जनाउँदै एमाले रंगेलीले शनिबार वृक्षारोपण गरिएको स्थानमा गोडमेल र सौन्दर्यकरणका लागि निल काँडाको विरुवा रोप्न सुरु गरेको छ । शनिबार विहानैदेखि एमाले रंगेलीको आयोजनामा काली मन्दिर अगाडीबाट नगरलाई सुन्दर बनाउन निल काँडाको विरुवा रोप्न सुरु गरिएको थियोे । सो कार्यको नेकपा (एमाले) मोरङका अध्यक्षसमेत रहेका प्रतिनिधिसभा सदस्य ऋषिकेश पोखरेलले सुभारम्भ गरे । सो अवसरमा बोल्दै सांसद पोखरेलले रंगेलीलाई समृद्ध बनाउन आफ्नो पार्टीको पूर्ण साथ रहने बताए । उनले नगरपालिकाको चौतर्फी विकासको अभियानमा नेकपा (एमाले) पनि सहभागी हुने बताए । सांसद पोखरेलले नगरपालिकाले बजार क्षेत्रमा वृक्षारोपण गर्दै रंगेलीलाई हरित नगरी बनाउन गरिएको सौन्दर्यकरणका लागि राजनीतिक दलहरुको तर्फबाट थोरै भएपनि योगदान गर्न चाहेको र त्यसै अन्तर्गत निल काँडा रोपिएको बताए । कार्यक्रममा रंगेली नगरपालिकाका मेयर दिलिप बगडीयाले आफ्नो ठाउँको चौतर्फी विकासका लागि सवै राजनीतिक दलहरुले दलिय स्वार्थ त्यागेर नगरपालिकालाई साथ दिनुपर्ने र सो कामको थालनी एमालेबाट भएको भन्दै धन्यवाद व्यक्त गरे । उनले नगरपालिकाले थालनी गरेको अभियानमा एमालेले जसरीनै अन्य राजनीतिक दलहरु पनि साथ दिए सवै हिसावले समृद्ध रंगेली बन्न धेरै समय नलाग्ने बताए । कार्यक्रममा नेकपा (एमाले) रंगेली नगर कमिटीका अध्यक्ष दलबहादुर बस्नेतले नगरपालिकाले वेतौनादेखि मधुवनीसम्म वृक्षारोपण गरेको ५ किलोमिटर क्षेत्रमा थप सौन्दर्यका लागि आफ्नै पार्टीको खर्चमा ६५ हजार निल काँडाको विरुवा रोपिने र त्यसको सुरुवात गरिएको जानकारी दिए । निल काँडा रोप्ने कार्यक्रममा रंगेली नगरपालिकाकी उपमेयर भूमा पराजुली, नेकपा (एमाले) का नेता कार्यकर्ता, स्थानीय नगरवासी, सुरक्षाकर्मीलगायतको सहभागीता थियो । शहरीकरणका कारण बढ्दो वातावरण प्रदुषण नियन्त्रण र स्वच्छ वातावरणका लागि रंगेली नगरपालिकाले आफ्नो क्षेत्रभित्र पर्ने हुलाकी राजमार्गको ५ किलोमिटर सडकको डिभाईडरमा वृक्षारोपण गरेको थियो ।