काठमाडौं । सशस्त्र प्रहरी बलकी कान्छीमाया कोजुले राष्ट्रिय कीर्तिमान कायम गर्दै ‘पिंकाथन’ काठमाडौं हाफ म्याराथनको उपाधि जितेकी छिन् । शुक्रबार सम्पन्न प्रतियोगितामा निर्धारित् २१ किलोमिटरको दुरी १ घन्टा १८ मिनेट २८ सेकेन्डमा पूरा गर्दै कान्छीमायाले प्रतियोगिताको उपाधि जितेकी हुन् ।
यसक्रममा उनले सन् २००६ मा भएको बर्लिन म्याराथनमा निर्मला भारतीले हाफ म्याराथनमा बनाएको राष्ट्रिय कीर्तिमान भंग गरेकी छन् । तर, यो नयाँ राष्ट्रिय कीर्तिमानलाई नेपाल एथ्लेटिक्स संघले आधिकारिकता दिन भने बाँकी छ । विजेता बनेसँगै कान्छीमायाले ५० हजार रुपैयाँका साथै मुम्बई म्याराथनमा प्रतिस्पर्धा गर्ने अवसर पाएकी छिन् । अघिल्लो साता सम्पन्न कान्तिपुर हाफ म्याराथनमा पनि महिलातर्फ कान्छीमाया नै विजयी बनेकी थिइन् ।
काठमाडौं पिंकाथनमा १ घन्टा २२ मिनेट ४५ सेकेन्डमा निर्धारित् दुरी पार गर्दै नेपाली सेनाकी रेशु बस्नेत दोस्रो भइन् । उनले २० हजार रुपैयाँका साथै मुम्बई म्याराथनमा सहभागी हुने अवसर पाइन् ।तेस्रो भएकी सेनाकै पुष्पा भण्डारीले १ घन्टा २४ मिनेट ३४ सेकेन्डमा निर्धारित दुरी पूरा गरिन् । उनले १० हजार रुपैयाँ प्राप्त गरिन् ।
काठमाडौं पिंकाथनअन्तर्गत् १० किलोमिटर दौडको उपाधि नेपाली सेनाकी सरिता बासीले जितेकी छन् । उनले निर्धारित् दुरी ३९ मिनेट ३७ सेकेन्डमा पूरा गरिन् ।दोस्रो भएकी आर्मीकै लक्ष्मी पाण्डेले ४० मिनेट १२ सेकेन्डको समय निकालिन् भने तेस्रो स्थान हासिल गरेकी मध्यपश्चिमकी धाविका फूलमती रानाले ४० मिनेट १५ सेकेन्डमा दौड सकाइन् ।
१० किलोमिटरतर्फ पहिलो हुनेले २० हजार, दोस्रोले १० हजार र तेस्रो हुनेले ५ हजार रुपैयाँ नगद पुरस्कार प्राप्त गरे । नेपाल एथलेटिक्स संघ सागको सहकार्यमा मुम्बईको संस्था लेजर पोर्ट र नेपालको शिवम ग्रुप होलिडेजको आयोजानमा काठमाडौंमा पहिलोपटक पिंकाथन आयोजना गरिएको हो ।
बलिउडका चर्चित मोडेल तथा पूर्वखेलाडी मिलिन्द सोमनले ५ वर्षअघि भारतको मुम्बईबाट पिंकाथन अभियान सुरु गरेका हुन् ।नेपालमा पहिलोपटक आयोजना गरिएको महिलालेमात्र सहभागिता जनाउन पाउने यो दौडमा झन्डै ३ हजार महिलाको सहभागिता रहेको थियो ।
