२८ साउन, काठमाडौं । पक्राउ परेका पत्रकार किशोर श्रेष्ठलाई भेट्न जिल्ला प्रहरी परिसर पुगेका उनका कानुन व्यवसायीहरूलाई प्रहरीले भेटघाट गर्न नदिएको बताइएको छ।
अधिवक्ता टिकाराम भट्टराईसहितका वकिलहरू श्रेष्ठसँग भेट गर्न प्रहरी परिसर पुगेका थिए। तर प्रहरीले अहिले भेट्न नमिल्ने जानकारी दिएपछि उनीहरू फर्किएका थिए। श्रेष्ठकी श्रीमती तथा पत्रकारसम्बद्ध विभिन्न संघ–संगठनका प्रतिनिधिलाई पनि भेटघाटको अनुमति नदिइएको जनाइएको छ।
श्रेष्ठलाई भेट्न प्रेस चौतारीका अध्यक्ष गणेश पाण्डे, प्रेस सेन्टरका अध्यक्ष कमल गिरी, महासचिव मनोज घर्ती तथा नेपाल प्रेस युनियनका महासचिव दिलिप पौडेललगायत प्रहरी परिसर पुगेका थिए। तर उनीहरूले पनि श्रेष्ठसँग भेट गर्न नपाएको प्रेस सेन्टरका महासचिव घर्तीले जानकारी दिएका छन्।
घर्तीका अनुसार श्रेष्ठका वकिल र श्रीमतीलाई समेत भेट्न नदिइएको विषयमा उनीहरूले प्रहरीसमक्ष आपत्ति जनाएका छन्। साथै प्रेस स्वतन्त्रता र मानवअधिकारको सम्मान गर्न प्रहरीको ध्यानाकर्षण गराइएको उनले बताएका छन्।
प्रहरीले श्रेष्ठको निवासबाट उनका परिवारका सदस्यले प्रयोग गर्ने ल्यापटपसमेत नियन्त्रणमा लिएको घर्तीको भनाइ छ। पढाइ तथा लेखनका लागि प्रयोग भइरहेका ती उपकरण कम्तीमा परिवारलाई फिर्ता गर्न आग्रह गरिएको भए पनि प्रहरीले त्यसमा सहमति नजनाएको उनले बताए।
श्रेष्ठलाई प्रहरीले वैयक्तिक गोपनीयतासम्बन्धी ऐन, २०७५ विपरीत कसुर गरेको आरोपमा अघिल्लो दिन पक्राउ गरेको थियो। त्यसपछि प्रहरी टोलीले जनआस्था साप्ताहिकको कार्यालयमा समेत खानतलासी गरेको थियो।
जिल्ला प्रहरी परिसरमा रहेका श्रेष्ठलाई अनुसन्धानका लागि हिरासतमा राख्ने म्याद लिन सरकारी वकिलको कार्यालय हुँदै जिल्ला अदालतमा उपस्थित गराउने तयारी गरिएको छ।
श्रेष्ठको पक्राउ तथा जनआस्थाको कार्यालयमा भएको खानतलासीको नेपाल पत्रकार महासंघ र नेपाल मिडिया सोसाइटीलगायत संस्थाले विरोध गरेका छन्। उनीहरूले श्रेष्ठलाई बिनासर्त रिहा गर्न र प्रेस स्वतन्त्रताको सम्मान गर्न माग गरेका छन्।
यसै विषयलाई लिएर नेपाल पत्रकार महासंघले जिल्ला प्रहरी परिसर काठमाडौं अगाडि प्रदर्शन तथा धर्नासमेत आयोजना गरेको छ।
