२८ साउन, काठमाडौं । नेपाल मिडिया सोसाइटीले जनआस्था साप्ताहिकका प्रधान सम्पादक तथा वरिष्ठ पत्रकार किशोर श्रेष्ठलाई तत्काल र नि:शर्त रिहा गर्न माग गरेको छ।
सोसाइटीले श्रेष्ठले प्रकाशित गरेको समाचारलाई लिएर कुनै गुनासो वा कानुनी प्रश्न भए त्यसको समाधान प्रचलित कानुन र प्रेससम्बन्धी स्थापित प्रक्रियाबाट खोजिनुपर्ने बताएको छ। समाचार प्रकाशन गरेकै कारण पत्रकारलाई पक्राउ गर्नु प्रेस तथा अभिव्यक्ति स्वतन्त्रताको भावनाविपरीत हुने उसको भनाइ छ।
सोसाइटीका महासचिव बोधराज त्रिपाठीद्वारा जारी विज्ञप्तिमा समाचारप्रति असहमति वा आपत्ति भए कानुनी बाटो तथा प्रेस काउन्सिलमार्फत उपलब्ध प्रक्रियाको प्रयोग गर्नुपर्ने उल्लेख गरिएको छ। पत्रकारलाई पक्राउ गरेर समस्याको समाधान खोज्नु उचित नभएको सोसाइटीको धारणा छ।
नेपालको संविधानले प्रत्याभूत गरेको प्रेस तथा अभिव्यक्ति स्वतन्त्रता, सूचनाको हक र स्वतन्त्र पत्रकारितालाई लोकतान्त्रिक व्यवस्थाका महत्वपूर्ण आधारका रूपमा उल्लेख गर्दै सोसाइटीले समाचार प्रकाशनकै कारण पत्रकारलाई त्रसित बनाउने गतिविधिले स्वतन्त्र पत्रकारिताको वातावरणमा नकारात्मक प्रभाव पार्न सक्ने जनाएको छ।
सञ्चारमाध्यम र पत्रकारले प्रचलित कानुन पालना गर्नुपर्ने विषयमा आफू स्पष्ट रहेको पनि सोसाइटीले जनाएको छ। तर पत्रकारिता वा प्रकाशित सामग्रीसँग सम्बन्धित विषयमा कानुनी उपचार खोज्दा प्रेस स्वतन्त्रताको संवैधानिक मूल्य, पत्रकारको व्यावसायिक अधिकार र प्रेससम्बन्धी स्थापित मान्यताको सम्मान गरिनुपर्नेमा उसले जोड दिएको छ।
स्वतन्त्र पत्रकारितामाथि हुने दबाब, हस्तक्षेप तथा दमनविरुद्ध निरन्तर खबरदारी गर्ने प्रतिबद्धता पनि नेपाल मिडिया सोसाइटीले जनाएको छ।
नेपाल प्रहरीले यसअघि पत्रकार श्रेष्ठलाई पक्राउ गरी उनीविरुद्ध वैयक्तिक गोपनीयतासम्बन्धी ऐन, २०७५ विपरीत कसुर गरेको आरोपमा अनुसन्धान भइरहेको जनाएको छ। त्यसपछि प्रहरी टोलीले जनआस्था साप्ताहिकको कार्यालयमा खानतलासीसमेत गरेको थियो।
श्रेष्ठको पक्राउ र कार्यालयमा गरिएको खानतलासीको नेपाल पत्रकार महासंघले पनि विरोध गरेको छ। महासंघको नेतृत्वमा पत्रकारहरूले श्रेष्ठको नि:शर्त रिहाइको माग गर्दै जिल्ला प्रहरी परिसर काठमाडौं अगाडि प्रदर्शन तथा धर्नासमेत दिएका छन्।
