अविरल वर्षापछि आएको बाढीका कारण ताप्लेजुङ र पाँचथर क्षेत्रमा सञ्चालनमा रहेका चार जलविद्युत् आयोजना बन्द भएका छन्। काबेली र इन्द्रावती खोलामा आएको बाढीले आयोजनाका बाँध, इन्टेक, पाइपलाइन, विद्युत्गृह तथा अन्य संरचनामा क्षति पुर्याएपछि करिब ५५ मेगावाट विद्युत् उत्पादन पूर्ण रूपमा ठप्प भएको हो।
शुक्रबार राति आएको बाढीले काबेली खोलाबाट उत्पादन हुँदै आएका २५ मेगावाट क्षमताको आयोजना र १० मेगावाट क्षमताको काबेली ‘बी–१’ क्यासकेड जलविद्युत् आयोजना प्रभावित भएका छन्। बाढीले बाँध क्षेत्रमा ढुंगा, माटो, लेदो र काठ थुपारेपछि पानी प्रवाह र उत्पादन प्रणाली अवरुद्ध भएको जनाइएको छ। आयोजनाका इन्टेकलगायतका संरचनामा पनि क्षति पुगेकाले उत्पादन पुनः सुरु गर्न केही समय लाग्न सक्ने बताइएको छ।
त्यसैगरी, रिडी हाइड्रोपावर लिमिटेडद्वारा सञ्चालित ९.९ मेगावाट क्षमताको इँवाखोला जलविद्युत् आयोजना र इँवा हाइड्रोपावरले इन्द्रावती खोलाबाट सञ्चालन गर्दै आएको ९.७ मेगावाट क्षमताको आयोजना पनि बन्द भएका छन्। बाढीले ती आयोजनाका बाँधस्थल, पाइपलाइन र विद्युत्गृह क्षेत्रमा असर पुर्याएको छ।
बन्द भएका आयोजनाबाट उत्पादित विद्युत् पाँचथरस्थित अमरपुर सव–स्टेशनमार्फत राष्ट्रिय प्रसारण लाइनमा जोडिँदै आएको थियो। उत्पादन रोकिएसँगै त्यस क्षेत्रबाट राष्ट्रिय प्रसारण लाइनमा आपूर्ति हुँदै आएको विद्युत् प्रभावित भएको छ।
https://biratkhabar.com/uploads/ads/ad_69b65a7e4ddcf_1773558398.gif
सम्बन्धित कम्पनीहरूले बाढीबाट भएको क्षतिको विस्तृत विवरण संकलन तथा मर्मत कार्य सुरु गरिएको जनाएका छन्। क्षतिको अवस्था मूल्यांकन गरेपछि मात्र उत्पादन पुनः सञ्चालन हुने समयबारे स्पष्ट जानकारी दिन सकिने बताइएको छ।
