- • एमालेको आरोप– प्रधानमन्त्रीले संसद्लाई छल्ने र अपमान गर्ने काम गरे
- • प्रधानमन्त्रीको व्यवहारले सदनको गरिमा घट्यो : एमाले
- • संसद्प्रति उत्तरदायी नभएको एमालेको आरोप
विराटनगर । प्रमुख प्रतिपक्षी दल नेकपा एमालेले प्रधानमन्त्रीले संसद्लाई छल्ने, अपमान गर्ने र जनताको मतको उपेक्षा गर्ने काम गरेको आरोप लगाएको छ।
बिहीबार बसेको प्रतिनिधिसभा बैठकमा प्रधानमन्त्री विधेयक पेश गर्न उपस्थित नभएको भन्दै विपक्षी दलहरूले विरोध जनाएका थिए। सोही क्रममा एमाले सांसद ऐनबहादुर महरले प्रधानमन्त्री संविधानअनुसार सदनप्रति गम्भीर र उत्तरदायी बन्न नसकेको टिप्पणी गरे।
उनले संविधानको धारा ७६ को उपधारा १० अनुसार सरकार सदनप्रति उत्तरदायी हुनुपर्ने उल्लेख गर्दै जनताको आवाजको सुनुवाइ गर्नुपर्ने बताए।
सांसद महरले भने, ‘कुरा नियमावलीको मात्र होइन, विषय नियतको हो । प्रधानमन्त्रीज्यूको नियत सदनलाई छल्ने, अपमान गर्ने र जनताको मतको उपेक्षा गर्ने देखियो ।’
उनले प्रधानमन्त्रीले प्रतिनिधिसभा नियमावलीमा भएको व्यवस्थालाई समेत बेवास्ता गरेको आरोप लगाए। महरका अनुसार यसले प्रधानमन्त्रीलाई थप स्वेच्छाचारी र निरंकुश बाटोतर्फ उत्प्रेरित गरेको छ।
प्रधानमन्त्रीको अनुपस्थितिलाई लिएर विपक्षी दलहरूले संसद्को गरिमा र उत्तरदायित्वमाथि प्रश्न उठाएको बताएका छन्।
