कोशी प्रदेशको नीति तथा कार्यक्रम आज प्रस्तुत हुँदै

विराटनगर । कोशी प्रदेश सरकारले आगामी आर्थिक वर्ष २०८३/८४ को वार्षिक नीति तथा कार्यक्रम आज प्रदेशसभामा प्रस्तुत गर्दैछ। बिहीबार दिउँसो ३ बजे बस्ने प्रदेशसभा बैठकमा प्रदेश प्रमुख परशुराम खापुङले सरकारका तर्फबाट नीति तथा कार्यक्रम प्रस्तुत गर्ने कार्यसूची रहेको छ।

प्रदेशसभाको नवौँ अधिवेशन बुधबारदेखि सुरु भएको हो। अधिवेशनको पहिलो दिन बसेको बैठकमा प्रदेशको वर्तमान अवस्था, सरकारको आगामी योजना र बजेट प्राथमिकताबारे विभिन्न दलका नेताहरूले धारणा राखेका थिए।

यसपटकको नीति तथा कार्यक्रममा स्वास्थ्य, शिक्षा, कृषि, पूर्वाधार विकास, पर्यटन र रोजगारी सिर्जनालाई प्राथमिकतामा राख्ने तयारी गरिएको छ। हिक्मतकुमार कार्की नेतृत्वको सरकारले कृषि, पर्यटन, पूर्वाधार र रोजगारीलाई केन्द्रमा राखेर नीति तथा कार्यक्रम तयार पारेको जनाइएको छ।

नीति तथा कार्यक्रममा जनमुखी योजनाहरूलाई समेत प्राथमिकता दिइएको बताइएको छ। विशेषगरी लागूऔषध प्रयोगकर्ताका लागि प्रदेशका दुई स्थानमा सरकारी स्तरबाट सुधार केन्द्र स्थापना गर्ने तयारी रहेको जनाइएको छ। यसका लागि कोभिड–१९ का समयमा निर्माण गरिएका क्वारेन्टाइन स्थललाई उपयोग गर्ने योजना अघि सारिएको छ।

त्यसैगरी, पहाडी क्षेत्रबाट बढ्दो बसाइँसराइ रोक्ने विषय पनि सरकारको प्राथमिकतामा परेको छ। पहाड केन्द्रित पूर्वाधार निर्माण, पर्यटन प्रवर्द्धन, औद्योगिकीकरण र रोजगारीका कार्यक्रममार्फत स्थानीयलाई आफ्नै थातथलोमा टिकाउने लक्ष्य राखिएको छ।

नीति तथा कार्यक्रम प्रस्तुत भएपछि प्रदेशसभामा त्यसबारे छलफल हुनेछ। सोही नीति तथा कार्यक्रमका आधारमा प्रदेश सरकारले आगामी असार १ गते आर्थिक वर्ष २०८३/८४ को बजेट ल्याउने तयारी गरेको छ। प्रदेशसभा सचिवालयले बैठकको सम्पूर्ण तयारी पूरा भएको जनाएको छ।