विराटनगर । नेपाली उत्पादन भारत निर्यातका लागि आवश्यक पर्ने ब्यूरो अफ इन्डियन स्ट्यान्डर्ड्स (बीआईएस) लाइसेन्स नवीकरण तथा नयाँ लाइसेन्स जारी प्रक्रियामा भारतीय पक्षबाट ढिलाइ हुँदा नेपाली उद्योगहरूको निर्यात प्रभावित भएको भन्दै मोरङ उद्योग व्यापार संघले ध्यानाकर्षण गराएको छ।
संघले बीआईएस लाइसेन्ससम्बन्धी प्रक्रियामा देखिएको ढिलासुस्तीले नेपालबाट भारततर्फ हुने निर्यातमा अवरोध सिर्जना भएको जनाएको छ। समस्या समाधानका लागि नेपाल सरकारले भारत सरकारसँग तत्काल कूटनीतिक पहल गर्नुपर्ने संघको माग छ।
संघका अनुसार नेपाली निर्यातकर्ताहरूको बीआईएस लाइसेन्स नवीकरण नहुनु र नयाँ लाइसेन्स जारी प्रक्रियामा ढिलाइ हुनुका कारण भारतीय बजारमा नेपाली उत्पादनको प्रवेश रोकिएको छ। विशेषगरी Foreign Manufacturer Certification Scheme अन्तर्गत आवेदन, निरीक्षण, परीक्षण र स्वीकृतिका प्रक्रियामा स्पष्ट समयसीमा नहुँदा द्विपक्षीय व्यापारमा असर परेको संघले जनाएको छ।
यस विषयमा संघले उद्योग विभागका महानिर्देशक तथा नेपाल उद्योग वाणिज्य महासंघलाई समेत पत्राचार गरेको छ। पत्रमार्फत भारतीय पक्षबाट सिर्जित गैर–भन्सार अवरोधका कारण नेपाली निर्यातमुखी उद्योग तथा व्यवसाय प्रत्यक्ष आर्थिक क्षतिमा परेको जानकारी गराइएको छ।
संघले सरकारले समयमै कूटनीतिक पहल नगरे नेपाली उद्योगहरू थप संकटमा पर्न सक्ने चेतावनी दिएको छ। भारतसँगको व्यापार घाटा कम गर्न निर्यात सहजीकरण महत्वपूर्ण हुने भन्दै संघले यस्ता प्राविधिक अवरोधलाई प्राथमिकताका साथ समाधान गर्नुपर्नेमा जोड दिएको छ।
संघले भविष्यमा यस्ता समस्या दोहोरिन नदिन भारतसँग उच्च तथा नीतिगत तहमा स्थायी संयन्त्र बनाउनुपर्ने सुझाव पनि दिएको छ। संघका अध्यक्ष अनुपम राठीद्वारा जारी विज्ञप्तिमा नेपाली उद्योगी व्यवसायीको हित संरक्षणका लागि सरकार गम्भीर हुनुपर्ने उल्लेख गरिएको छ।
