१७ चैत, विराटनगर । संसद् सचिवालयले सर्वदलीय बैठक बोलाएको छ। सरकारको सिफारिसमा राष्ट्रपतिबाट संघीय संसद्को अधिवेशन आह्वान भएपछि सचिवालयले यो बैठक तय गरेको हो।
गत २१ फागुनमा सम्पन्न प्रतिनिधिसभा सदस्य निर्वाचनबाट निर्वाचित सांसदहरूको पहिलो बैठक १९ चैत दिउँसो २ बजेका लागि बोलाइएको छ।
संघीय संसद् सचिवालयका सहसचिव तथा प्रवक्ता एकराम गिरीका अनुसार त्यसअघि बुधबार दिउँसो १ बजे सर्वदलीय बैठक बस्नेछ। प्रतिनिधिसभाको बैठक सुरु हुनुभन्दा एक घण्टा अगाडि यो बैठक राखिएको हो।
बैठकमा सबै राजनीतिक दलका प्रतिनिधि, सरकारका प्रतिनिधि तथा संघीय संसद् सचिवालयका अधिकारीहरू सहभागी हुनेछन्।
अब बस्ने प्रतिनिधिसभाको बैठकले सभामुख निर्वाचनको प्रक्रिया अघि बढाउनेछ। साथै, राजनीतिक दलहरूले चाहेको अवस्थामा शीर्ष नेताहरूले शुभकामना मन्तव्य दिने अभ्यास पनि रहनेछ।
