मन्त्रालय संख्या घटाउने तयारीमा सरकार, बालेन नेतृत्वमा १५–१८ मा सीमित गर्ने योजना

१३ चैत, काठमाडौं । नयाँ प्रधानमन्त्री बालेन शाहको नेतृत्वमा सरकार गठनसँगै मन्त्रालयहरूको संख्या घटाउने तयारी सुरु गरिएको छ। हाल रहेको २१ मन्त्रालयलाई घटाएर १५ देखि १८ को बीचमा सीमित गर्ने योजना बनाइएको छ।

प्रधानमन्त्री नजिक स्रोतका अनुसार सरकारलाई सानो, प्रभावकारी र व्यवस्थापनयोग्य बनाउन केही मन्त्रालयहरू एकआपसमा गाभ्ने तयारी भइरहेको छ। यसअनुसार खानेपानी, शहरी विकास तथा युवा तथा खेलकुद मन्त्रालयलाई अन्य मन्त्रालयसँग समायोजन गर्ने सम्भावनामा छलफल चलिरहेको छ।

त्यसैगरी संघीय मामिला तथा सामान्य प्रशासन मन्त्रालयलाई पनि पुनर्संरचना गर्ने विषयमा विचार भइरहेको छ। कर्मचारी प्रशासनको जिम्मेवारी प्रधानमन्त्री तथा मन्त्रिपरिषद कार्यालय अन्तर्गत राख्ने र संघीय मामिलालाई कानून मन्त्रालयमा गाभ्ने विकल्पबारे पनि अध्ययन भइरहेको छ।

पूर्वाधारसँग सम्बन्धित मन्त्रालयहरूलाई एउटै संरचनामा ल्याएर कार्यक्षमता बढाउने उद्देश्य सरकारको रहेको बताइएको छ। साथै महिला, बालबालिका तथा जेष्ठ नागरिक मन्त्रालयसँग युवा तथा खेलकुद मन्त्रालयलाई पनि जोड्ने विषयमा प्रारम्भिक छलफल भएको छ।

मन्त्रालय कटौतीको अन्तिम निर्णय भने मन्त्रिपरिषद बैठकबाट हुनेछ। कार्यविभाजन नियमावली संशोधनपछि मात्रै मन्त्रालयको संख्या र जिम्मेवारी औपचारिक रूपमा तय गरिनेछ।