- • १. सिरहामा माघ १६ गते खेत जोतिरहेका बेला प्रेमनाथ यादवको गोली हानी हत्या भएको थियो, तर करिब दुई महिना बित्दा पनि प्रहरीले मुख्य दोषी पक्राउ गर्न सकेको छैन।
- • २. प्रहरीले प्रत्यक्षदर्शीसहित १४ जनासम्मलाई अनुसन्धानको दायरामा ल्याएर सोधपुछ गरे पनि घटना कसले गर्यो भन्ने निष्कर्षमा पुग्न सकेको छैन।
- • ३. मृतकका परिवारले ढिलो न्यायप्रति चिन्ता व्यक्त गरेका छन् भने प्रहरीले अनुसन्धान जारी रहेको र दोषी पक्राउ पर्ने दाबी गरेको छ।
९ चैत, सिरहा । सिरहामा एक व्यक्तिको गोली हानी हत्या भएको करिब दुई महिना बितिसक्दा पनि घटनामा संलग्न मुख्य दोषी पत्ता लाग्न सकेको छैन। सिरहा नगरपालिका–१ का करिब ४५ वर्षीय प्रेमनाथ यादवको माघ १६ गते सिरहा नगरपालिका–७ अन्तर्गत मैनाबत्ती खोला किनारमा ट्याक्टरले खेत जोतिरहेको अवस्थामा गोली प्रहार गरी हत्या गरिएको थियो।
मृतकका भाइ अभयनाथ यादवका अनुसार घटनाका बेला रामबिलास यादव र रामप्रसाद महरा प्रत्यक्षदर्शीका रूपमा उपस्थित थिए। प्रहरीले उनीहरूलाई नियन्त्रणमा लिएर सोधपुछ गरेको भए पनि २३ दिनपछि दुवै जनालाई रिहा गरिएको थियो। त्यसयता पनि हत्या कसले गर्यो भन्ने स्पष्ट हुन नसकेको भन्दै परिवारले चिन्ता व्यक्त गरेको छ।
अभयनाथ यादवले प्रहरीले अनुसन्धान भइरहेको भने पनि अहिलेसम्म कुनै ठोस उपलब्धि सार्वजनिक नभएको बताएका छन्। उनका अनुसार हत्यामा संलग्न व्यक्तिलाई कानुनी दायरामा ल्याएर परिवारलाई न्यायको अनुभूति दिलाउन राज्यले छिटो काम गर्नुपर्छ।
मृतक प्रेमनाथका दुई छोरा छन्, जसको उमेर १७ र १४ वर्ष रहेको बताइएको छ। परिवारका अनुसार बुवाको हत्यापछि उनीहरूको भविष्य अन्योलमा परेको छ। कक्षा १० मा अध्ययनरत जेठा छोरा रामजन्म यादवले बुवा परिवारको मुख्य आधार रहेको र उनको मृत्यु भएपछि घरको अवस्था जटिल बनेको बताएका छन्।
जिल्ला प्रहरी कार्यालय सिरहाका प्रमुख एसपी बासुदेव पाठकले भने घटनाको अनुसन्धान सक्रिय रूपमा चलिरहेको बताएका छन्। उनका अनुसार प्रारम्भिक चरणमा प्रत्यक्षदर्शी भनिएका दुई जनालाई बयानका लागि ल्याइएको थियो र आवश्यक सोधपुछपछि छाडिएको हो। उनले हालसम्म १४ जनालाई अनुसन्धानको दायरामा ल्याइएको र आवश्यक कागजी प्रक्रिया पूरा गरेपछि उनीहरूलाई छाडिएको जानकारी दिए।
प्रहरीका अनुसार केन्द्रीय अनुसन्धान ब्युरोसँग पनि समन्वय गरेर घटनाको अनुसन्धान अगाडि बढाइएको छ। एसपी पाठकले सुरुमा प्रत्यक्षदर्शी भनिएका व्यक्तिहरूले धेरै कुरा नखोले पनि अनुसन्धान क्रमशः अघि बढ्दै जाँदा केही महत्वपूर्ण सूचना प्राप्त भएको बताएका छन्। त्यसपछि उनीहरूलाई साधारण तारिखमा छाडिएको र आवश्यक परे फेरि नियन्त्रणमा लिन सकिने उनको भनाइ छ।
उनले प्रत्यक्षदर्शी भनिएका व्यक्तिहरू नै घटनामा संलग्न हुन् वा होइनन् भन्ने कुरा अझै स्पष्ट भइनसकेको बताए। यद्यपि पीडित परिवारले न्याय पाउनेमा विश्वस्त रहन आग्रह गर्दै अनुसन्धान ढिला भए पनि अन्ततः दोषी पक्राउ पर्ने दाबी उनले गरेका छन्।
तर ५२ दिन बित्दा पनि हत्यारा पक्राउ पर्न नसक्दा परिवार भने अझै अन्योल, पीडा र न्यायको प्रतीक्षामा छ।
