५ चैत, काठमाडौं । कम्बोडियामा विभिन्न कारणले अलपत्र परेका २० नेपालीलाई थाइल्याण्डको बैंककस्थित नेपाली दूतावासले उद्धार गरेको छ।
उद्धार गरिएका नेपालीहरू विभिन्न प्रलोभनमा परेर कम्बोडिया पुगेका थिए र उनीहरू अनलाइन स्क्यामिङ केन्द्रहरू, क्यासिनो र अन्य गैरकानुनी काममा संलग्न थिए। दूतावासको पहल र कम्बोडियाली सरकारको सहयोगमा उनीहरूलाई काठमाडौं फर्काउन सकिएको हो।
उद्धार गरिएकाहरुलाई गैरआवासीय नेपाली संघ, कम्बोडियाको सहजीकरणमा बुधबार काठमाडौं पठाइएको थियो र उनीहरू शुक्रबार त्रिभुवन विमानस्थलमा अवतरण भएका छन्।
अलपत्र परेका अन्य नेपालीहरूको पनि उद्धारको प्रयास जारी रहेको दूतावासले जनाएको छ। साथै, कम्बोडियामा कठिन अवस्थामा रहेका नेपालीहरूलाई दूतावासको सम्पर्क विवरण र गैरआवासीय नेपाली संघका प्रतिनिधिहरूसँग सम्पर्क गर्न अनुरोध गरिएको छ।
दूतावासले नेपाली नागरिकलाई प्रलोभनमा नपर्ने र नेपाल सरकारले तोकेका मापदण्डका आधारमा मात्र श्रम स्वीकृति प्राप्त गरी विदेश जान चेतावनी दिएको छ।
