प्रतिनिधिसभा निर्वाचनमा उम्मेदवारी दिएकी अभिनेत्री निशा अधिकारीले आफ्नो चुनावी खर्च र आम्दानीको विवरण सार्वजनिक गरेकी छन्।
जिल्ला निर्वाचन कार्यालयमा बुझाइएको विवरणअनुसार उनले चुनाव प्रचारमा ७ लाख ७६ हजार ९२१ रुपैयाँ खर्च गरेकी छन्।
विवरण हेर्दा सबैभन्दा बढी खर्च सामाजिक सञ्जाल विज्ञापन र डिजाइन मा भएको देखिन्छ। यस शीर्षकमा मात्रै उनले २ लाख ५० हजार रुपैयाँ खर्च गरेको उल्लेख छ। त्यस्तै, स्वयंसेवकका लागि खाजा, खाना र यातायातमा १ लाख २९ हजार ७०७ रुपैयाँ खर्च गरिएको देखिएको छ।
आम्दानीतर्फ भने निशाले आफ्नो दल गतिशील लोकतान्त्रिक पार्टी बाट २ लाख रुपैयाँ, २४ जना व्यक्तिबाट प्राप्त सहयोगमार्फत ५ लाख ४९ हजार ६७ रुपैयाँ र आफ्नै तर्फबाट २७ हजार ८८५ रुपैयाँ जुटाएको विवरण पेश गरेकी छन्।
निशाले आफ्नो चुनावी अभियानलाई सकेसम्म कम खर्चिलो, भड्किलोपनरहित र पारदर्शी बनाउने प्रयास गरेको बताएकी छन्। उनका अनुसार अभियानमा नागरिकसँग प्रत्यक्ष संवाद, भेटघाट, घरदैलो र साना छलफललाई प्राथमिकतामा राखिएको थियो।
उनी काठमाडौं क्षेत्र नम्बर ५ बाट प्रतिनिधिसभा सदस्यका लागि चुनाव लडेकी थिइन्।
यता, अभिनयतर्फ निशा अहिले फिल्म ‘कस्तुरी’ को छायांकनमा व्यस्त रहेकी छन्।
