- • माघ ११ गते सम्पन्न राष्ट्रिय सभा निर्वाचनबाट निर्वाचित १८ सांसदले सिंहदरबारस्थित कानुन, न्याय तथा मानव अधिकार समितिको हलमा पद तथा गोपनीयताको शपथ लिएका छन्।
- • राष्ट्रिय सभाका अध्यक्ष नारायणप्रसाद दाहालले विशेष समारोहबीच नवनिर्वाचित सदस्यहरूलाई शपथ गराएका हुन्।
- • विभिन्न प्रदेशबाट निर्वाचित सांसदहरूले शपथसँगै औपचारिक रूपमा संसदीय जिम्मेवारी सुरु गरेका छन्, जबकि राष्ट्रिय सभाको बाँकी एक सिट राष्ट्रपतिबाट मनोनीत हुने प्रावधानअनुसार पूर्ति गरिनेछ।
२५ फागुन — माघ ११ गते सम्पन्न राष्ट्रिय सभा निर्वाचनबाट निर्वाचित भएका सांसदहरूले आइतबार पद तथा गोपनीयताको शपथ लिएका छन्। सिंहदरबारस्थित कानुन, न्याय तथा मानव अधिकार समितिको हलमा आयोजित विशेष समारोहमा राष्ट्रिय सभाका अध्यक्ष नारायणप्रसाद दाहालले नव निर्वाचित सदस्यहरूलाई शपथ गराएका हुन्।
राष्ट्रिय सभामा एक तिहाइ सदस्यको पदावधि प्रत्येक दुई–दुई वर्षमा सकिने संवैधानिक व्यवस्थाअनुसार यसपटक १९ जना सदस्यको कार्यकाल २० फागुनमा समाप्त भएको थियो। तीमध्ये १८ सिटका लागि निर्वाचन भएको हो भने बाँकी एक सदस्य सरकारको सिफारिसमा राष्ट्रपतिबाट मनोनीत हुने व्यवस्था रहेको छ।
माघ ११ गते भएको निर्वाचनमा नेपाली कांग्रेस, नेकपा एमाले र लोकतान्त्रिक समाजवादी पार्टी (लोसपा) बीच तालमेल भएको थियो। सोही समझदारीका आधारमा विभिन्न प्रदेशबाट उम्मेदवारहरू विजयी बनेका थिए।
कोशी प्रदेशबाट सुनिलबहादुर थापा, रोशनी मेचे र सोम पोर्तेल निर्वाचित भएका छन्। मधेश प्रदेशबाट महन्थ ठाकुर, धमेन्द्र पासवान, रन्जित कर्ण र रेखा झा विजयी भएका थिए।
त्यसैगरी बागमती प्रदेशबाट गीता देवकोटा र डा. प्रेम दंगाल निर्वाचित भएका छन् भने गण्डकी प्रदेशबाट जगत तिमिल्सिना र सम्झना देवकोटा राष्ट्रिय सभामा पुगेका छन्। लुम्बिनी प्रदेशबाट रामकुमारी झाँक्री, वासुदेव जंगली र चन्द्रबहादुर केसी विजयी भएका छन्।
कर्णाली प्रदेशबाट ललितजंग शाही र मिना रखाल निर्वाचित भएका छन् भने सुदूरपश्चिम प्रदेशबाट खम्मबहादुर खाती र लीला भण्डारी राष्ट्रिय सभा सदस्यमा निर्वाचित भएका छन्।
नवनिर्वाचित सदस्यहरूले शपथसँगै आफ्नो संसदीय जिम्मेवारी औपचारिक रूपमा सुरु गरेका छन्। अब उनीहरू राष्ट्रिय सभाको आगामी बैठक तथा संसदीय प्रक्रियामा सहभागी हुनेछन्।
