विराटनगर । कोशी प्रदेशको मुख्यमन्त्री तथा मन्त्रिपरिषद्को कार्यालयमा रहेका केही सरकारी उपकरणहरूको अवस्थाबारे प्रश्न उठाउँदै छानबिनको माग गरिएको छ। ‘हेलो सीएम’ प्रणालीमार्फत दर्ता गरिएको एक उजुरीमा २०८२ भदौ २४ गते भएको जेनजी आन्दोलनका क्रममा क्षति भएको भनिएका ३० वटा ल्यापटप र १४ वटा मोबाइल फोनको वास्तविक अवस्थाबारे सत्यतथ्य सार्वजनिक गर्न आग्रह गरिएको छ।
उजुरीकर्ताले ती सामग्री वास्तवमै नष्ट भएका हुन् वा अन्य कुनै कारणले हराएका अथवा दुरुपयोग भएका हुन् भन्ने विषयमा निष्पक्ष अनुसन्धान हुनुपर्ने बताएका छन्। आवश्यक परे सम्बन्धित सामग्रीको भौतिक परीक्षण गरी वास्तविकता पत्ता लगाउन तथा जिम्मेवार पक्षलाई कानुनी दायरामा ल्याउन माग गरिएको छ।
असार ३ गते दर्ता भएको उक्त उजुरीमाथि हेलो सीएम कक्षले अनुगमन गरिरहेको जनाएको छ। उजुरीमा सरकारी खर्च, जिन्सी व्यवस्थापन, खरिद प्रक्रिया, कर्मचारी सुविधा, ठेक्का तथा बोलपत्र व्यवस्थापनलगायत क्षेत्रमा पारदर्शिता र जवाफदेहिताको आवश्यकता औँल्याइएको छ।
साथै सार्वजनिक स्रोतसाधनको सही उपयोग सुनिश्चित गर्दै प्रशासनिक सुधारका लागि प्रभावकारी कदम चाल्नुपर्ने माग समेत गरिएको छ।
