विराटनगर । विराटनगरको मेनरोडस्थित जैन भवन छेउमा रहेको एनआईसी एसिया बैंकको एटिएममा तोडफोड गरिएको छ। गएराति अज्ञात समूहले एटिएम रहेको बाहिरी कोठामा प्रवेश गरी मेसिनमा क्षति पुर्याएको हो।
बैंकका अनुसार एटिएममा चोरी गर्ने उद्देश्यले तोडफोड गरिएको देखिएको छ। घटनाबारे प्रहरीलाई जानकारी गराइसकिएको बैंकले जनाएको छ।
तोडफोड भए पनि एटिएमभित्र रहेको रकम भने सुरक्षित रहेको बताइएको छ। वडा प्रहरी कार्यालयबाट करिब दुई–तीन सय मिटर दक्षिणतर्फ रहेको उक्त एटिएममा कसले तोडफोड गरी रकम चोरीको प्रयास गरेको हो भन्ने अझै खुल्न सकेको छैन।
यसअघि पनि विराटनगरका विभिन्न एटिएमबाट रकम चोरी गर्ने प्रयास भएका घटनाहरू सार्वजनिक हुँदै आएका छन्। तर, त्यस्ता घटनामा संलग्न व्यक्तिहरूको पहिचान हुन सकेको छैन।
बैंक तथा वित्तीय संस्था केन्द्रित क्षेत्रहरूको सुरक्षा व्यवस्था अझ कडा बनाउनुपर्ने माग यसअघि पनि बैंकरहरूले उठाउँदै आएका छन्।
