विराटनगर । पूर्वी नाका काँकडभिट्टाबाट ठूलो परिमाणमा सुन र विदेशी मुद्रा बरामद भएको छ। सशस्त्र प्रहरी बल र मेची भन्सार कार्यालयको संयुक्त टोलीले भारतबाट नेपाल ल्याइँदै गरेको सुन तथा रकमसहित एक जनालाई नियन्त्रणमा लिएको हो।
सोमबार साँझ जाँचका क्रममा २४ क्यारेट ९९९.९ प्योरिटीको ५७० ग्राम सुन बरामद गरिएको प्रहरीले जनाएको छ। बरामद सुनको बजार मूल्य करिब १ करोड ५५ लाख रुपैयाँभन्दा बढी पर्ने बताइएको छ।
घटनामा संलग्न रहेको आरोपमा भारतको कोलकाता निवासी ३९ वर्षीय परम पाठक पक्राउ परेका छन्। उनको साथबाट २० हजार अमेरिकी डलर र ८४ हजार ५ सय ७० भारतीय रुपैयाँसमेत बरामद गरिएको सशस्त्र प्रहरीले जनाएको छ।
प्रहरीका अनुसार बरामद अमेरिकी डलरको नेपाली मूल्य करिब २० लाख ६४ हजार रुपैयाँ बराबर छ। सुन र विदेशी मुद्रासँगै पाठकको साथबाट सवारी चालक अनुमतिपत्र, आधार कार्ड, विभिन्न बैंकका कागजात, सिमकार्ड, मोबाइल फोन र चेकसमेत नियन्त्रणमा लिइएको छ।
बरामद सामग्री र पक्राउ परेका व्यक्तिलाई थप अनुसन्धान तथा कानुनी प्रक्रियाका लागि सम्बन्धित निकायमा बुझाइएको सशस्त्र प्रहरी बल काँकडभिट्टाका डीएसपी विकास थापाले जानकारी दिएका छन्।
