काठमाडौं । आज बस्ने प्रतिनिधिसभा बैठकका लागि ६ वटा कार्यसूची तय गरिएको छ। बैठक बिहान ११ बजे सुरु हुने संसद् सचिवालयले जनाएको छ।
बैठकको पहिलो कार्यसूचीमा सरकारको वार्षिक नीति तथा कार्यक्रममाथि छलफल गर्ने विषय राखिएको छ। राष्ट्रपति रामचन्द्र पौडेलले वैशाख २८ गते संघीय संसद्को संयुक्त बैठकमा आर्थिक वर्ष २०८३/०८४ का लागि सरकारको नीति तथा कार्यक्रम प्रस्तुत गरेका थिए। तर, उक्त नीति तथा कार्यक्रममाथि प्रतिनिधिसभामा हालसम्म छलफल अघि बढ्न सकेको छैन।
बुधबारको बैठकमा पनि नीति तथा कार्यक्रममाथि छलफल गर्ने कार्यसूची थियो। तर, विपक्षी दलहरूको अवरोधका कारण बैठक कार्यसूचीमा प्रवेश नगरी प्रभावित भएको थियो।
दोस्रो कार्यसूचीमा प्रधानमन्त्री वालेन्द्र शाहले नीति तथा कार्यक्रममाथिको छलफलका क्रममा सांसदहरूले उठाएका प्रश्नहरूको जवाफ दिने कार्यक्रम रहेको छ। यद्यपि, प्रधानमन्त्री शाह बैठकमा उपस्थित हुने विषय निश्चित नभएको संसद् सचिवालय स्रोतले जनाएको छ। प्रधानमन्त्रीले आफ्नो तर्फबाट अन्य मन्त्रीमार्फत पनि जवाफ दिन सक्ने व्यवस्था छ।
यसअघि बुधबारको बैठकमा प्रधानमन्त्रीको अनिवार्य उपस्थितिको माग गर्दै विपक्षी दलहरूले अवरोध गरेका थिए। सोही कारण बैठक अघि बढ्न सकेको थिएन।
तेस्रो कार्यसूचीमा नीति तथा कार्यक्रममाथि दर्ता भएका संशोधन प्रस्तावहरू निर्णयार्थ प्रस्तुत गर्ने उल्लेख छ। त्यसपछि सभामुखले नेपाल सरकारको वार्षिक नीति तथा कार्यक्रमलाई निर्णयार्थ प्रस्तुत गर्ने चौथो कार्यसूची तय गरिएको छ।
पाँचौँ कार्यसूचीअनुसार अर्थमन्त्री डा. स्वर्णिम वाग्लेले आर्थिक वर्ष २०८३/०८४ को विनियोजन विधेयकका सिद्धान्त र प्राथमिकता, कर प्रस्ताव बाहेक, माथि छलफल गरियोस् भन्ने प्रस्ताव पेश गर्नेछन्।
त्यस्तै, छैटौँ कार्यसूचीमा प्रतिनिधिसभा नियमावली मस्यौदा समितिका सभापति गणेश पराजुलीले ‘प्रतिनिधिसभा नियमावली मस्यौदा समितिको प्रतिवेदन, २०८३’ माथि विचार गरियोस् भन्ने प्रस्ताव प्रस्तुत गर्ने कार्यक्रम रहेको छ।
