सिरहा । सिरहाको बरियारपट्टीस्थित छोटी भन्सार कार्यालय बन्द गर्ने सरकारको निर्णयविरुद्ध स्थानीयवासी र व्यापारीहरू आन्दोलनमा उत्रिएका छन्। विरोध प्रदर्शनका कारण बरियारपट्टी चोक क्षेत्रमा हुलाकी मार्ग अवरुद्ध हुँदा सवारी आवागमन प्रभावित भएको छ।
सरकारले २०८३ वैशाख २४ गते राजपत्रमा सूचना प्रकाशित गर्दै बरियारपट्टी छोटी भन्सार कार्यालय बन्द गर्ने निर्णय गरेको थियो। उक्त निर्णयले सीमावर्ती क्षेत्रको व्यापार, राजस्व संकलन र स्थानीय आर्थिक गतिविधिमा असर पर्ने भन्दै स्थानीयवासी तथा व्यापारीले निर्णय फिर्ताको माग गरेका छन्।
बरियारपट्टी गाउँपालिका–३ स्थित बरियारपट्टी चोकमा भेला भएका प्रदर्शनकारीहरूले सडकको बीचभागमा बेन्च राखेर बिहान करिब ८:३० बजेदेखि हुलाकी मार्ग अवरुद्ध गरेका थिए। सडक अवरुद्ध हुँदा पूर्व–पश्चिमतर्फ गुड्ने सवारीसाधन प्रभावित भएको स्थानीयले बताएका छन्।
आन्दोलनरत पक्षले बरियारपट्टी छोटी भन्सार कार्यालय पुनः सञ्चालन गर्नुपर्ने माग अघि सारेको छ। उनीहरूका अनुसार भन्सार कार्यालय बन्द हुँदा सीमावर्ती बजारको कारोबार घट्ने, व्यवसायीलाई समस्या पर्ने र स्थानीय अर्थतन्त्रमा प्रत्यक्ष असर पर्नेछ।
जिल्ला प्रहरी कार्यालय सिरहाका डिएसपी तथा प्रवक्ता रमेशबहादुर पालले अवरुद्ध सडक खुलाउने विषयमा आन्दोलनकारीसँग वार्ता र समन्वय भइरहेको जानकारी दिए। उनका अनुसार स्थिति सामान्य बनाउन प्रयास जारी छ। घटनास्थलमा जिल्ला प्रहरी कार्यालय सिरहाका प्रमुख एसपी बासुदेव पाठकसमेत खटिएको बताइएको छ।
प्रदर्शनमा बजार व्यवस्थापन समिति अध्यक्ष अम्बेय कुमार यादव, सुखीपुर उद्योग व्यापार समिति सचिव सञ्जय कुमार यादव, वडा अध्यक्ष विनोद यादवलगायत स्थानीयवासी तथा व्यापारीहरूको सहभागिता रहेको थियो।
