- • १. दक्षिण लेबनानमा युनिफिलका शान्ति सैनिक सवार गाडीमाथि भएको विस्फोटमा दुई जनाको मृत्यु भएको छ भने एक जना घाइते भएका छन्।
- • २. इन्डोनेसियाले मृतकमध्ये एक जना आफ्ना नागरिक रहेको पुष्टि गर्दै घटनाको निष्पक्ष छानबिनको माग गरेको छ।
- • ३. संयुक्त राष्ट्रसंघले शान्ति सैनिकमाथि बढ्दो आक्रमणप्रति चिन्ता व्यक्त गर्दै सबै पक्षलाई अन्तर्राष्ट्रिय कानुन पालना गर्न आग्रह गरेको छ।
१७ चैत, काठमाडौं । दक्षिण लेबनानमा संयुक्त राष्ट्रसंघका शान्ति सैनिकमाथि पुनः घातक आक्रमण भएको छ। यस घटनामा दुई शान्ति सैनिकको ज्यान गएको छ भने एक जना घाइते भएका छन्।
लेबनानका लागि संयुक्त राष्ट्रसंघीय अन्तरिम शान्ति सेना (युनिफिल)का अनुसार दक्षिणी लेबनानको बानी हय्यान गाउँ नजिक शान्ति सैनिक सवार सवारीसाधन विस्फोटमा परेको थियो। घटनापछि गाडीमा ठूलो क्षति पुगेको बताइएको छ।
युनिफिलले सोमबार भएको उक्त आक्रमणमा आफ्ना दुई सदस्यको मृत्यु भएको र एक जना घाइते भएको जानकारी दिएको छ। शान्ति स्थापनाको जिम्मेवारीमा खटिएका सुरक्षाकर्मीले ज्यान गुमाउनुपर्ने अवस्था आउनु नपर्ने भन्दै उसले दुःख व्यक्त गरेको छ।
यसअघि आइतबार पनि दक्षिण लेबनानकै अल–कुसायर नजिक युनिफिलको एक पोष्टमा आक्रमण हुँदा एक शान्ति सैनिक मारिएका थिए। त्यस्तै माइस–अल–जबाल क्षेत्रमा नेपाली शान्ति सैनिक रहेको कमाण्ड पोष्टमा पनि आक्रमण भएको थियो। त्यस घटनामा मानवीय क्षति नभए पनि केही व्यक्तिगत सामग्रीमा क्षति पुगेको थियो।
सोमबारको घातक घटनामा ज्यान गुमाउनेमध्ये एक जना इन्डोनेसियाली सैनिक रहेको पुष्टि भएको छ। इन्डोनेसियाको विदेश मन्त्रालयले मृतक आफ्नै नागरिक भएको जनाएको छ। साथै, थप तीन इन्डोनेसियाली शान्ति सैनिक घाइते भएको जानकारी पनि सार्वजनिक गरिएको छ।
इन्डोनेसिया सरकारले घटनाको कडा शब्दमा निन्दा गर्दै निष्पक्ष र पारदर्शी अनुसन्धानको माग गरेको छ। उसले लेबनानको सार्वभौमिकता, भौगोलिक अखण्डता र नागरिक संरचनाको सम्मान गर्न आग्रह गरेको छ। साथै संवादमार्फत तनाव कम गर्न पनि आह्वान गरेको छ।
संयुक्त राष्ट्रसंघका महासचिव एन्टोनियो गुटेरेसले घटनाप्रति गम्भीर चिन्ता व्यक्त गर्दै सबै पक्षलाई अन्तर्राष्ट्रिय मानवीय कानुनको पालना गर्न र शान्ति सैनिक तथा संयुक्त राष्ट्रसंघीय कर्मचारीको सुरक्षा सुनिश्चित गर्न आग्रह गरेका छन्। उनका अनुसार पछिल्ला घटनाले शान्ति मिसनमा खटिएका सुरक्षाकर्मीको सुरक्षामा गम्भीर जोखिम थपिएको छ।
फ्रान्सले संयुक्त राष्ट्रसंघीय सुरक्षा परिषद्को आपतकालीन बैठक बोलाउन आग्रह गरेको छ। फ्रान्स, स्पेन र आयरल्याण्ड लगायतका मुलुकहरूले युनिफिलमाथिका आक्रमणलाई अस्वीकार्य भन्दै तत्काल हिंसा रोक्न अपिल गरेका छन्।
पछिल्ला आक्रमणहरू इजरायलले लेबनानमा आफ्नो स्थल कारबाही विस्तार गरिरहेका बेला भएका हुन्। इजरायलले आफ्नो उत्तरी क्षेत्रलाई हेजबोल्लाहको आक्रमणबाट जोगाउने उद्देश्यले सैन्य अभियान तीव्र बनाएको जनाएको छ।
फेब्रुअरी २८ यता क्षेत्रीय तनाव चर्किएसँगै लेबनानमा हिंसा झन् बढेको छ। लेबनानको स्वास्थ्य मन्त्रालयका अनुसार इजरायली कारबाहीका कारण हालसम्म १ हजार २०० भन्दा बढी मानिसले ज्यान गुमाइसकेका छन् भने १२ लाखभन्दा धेरै नागरिक विस्थापित भएका छन्।
दक्षिणी लेबनानमा झडप र आक्रमणका घटना बढ्दै जाँदा शान्ति सैनिकहरू समेत असुरक्षित बन्न थालेका छन्, जसले समग्र क्षेत्रीय स्थिरतामाथि थप प्रश्न उठाएको छ।
