- • बालेन शाह नेतृत्वमा बन्ने मन्त्रिपरिषद् १५ सदस्यीय हुने र मन्त्रालय संख्या घटाइने तयारी छ।
- • शहरी विकास, युवा, खानेपानी, भूमि व्यवस्था र वन तथा वातावरण मन्त्रालय गाभिनेछन्।
- • मन्त्रिपरिषद् बैठकले कार्यविभाजन नियमावली संशोधन गरेर औपचारिक निर्णय गर्नेछ।
१३ चैत, काठमाडौं । प्रधानमन्त्री बालेन शाह नेतृत्वमा बन्ने नयाँ मन्त्रिपरिषद्मा मन्त्रालयहरूको संख्या घटाउने तयारी गरिएको छ। सार्वजनिक विवरणअनुसार अब बन्ने मन्त्रिपरिषद् करिब १५ सदस्यीय हुनेछ।
सरकारलाई सानो र प्रभावकारी बनाउने उद्देश्यले केही मन्त्रालयहरू गाभ्ने योजना अघि बढाइएको छ। स्रोतका अनुसार अहिले कम्तिमा पाँचवटा मन्त्रालय अन्य मन्त्रालयमा समायोजन गरिनेछ।
गाभिने मन्त्रालयहरूमा शहरी विकास, युवा तथा खेलकुद, खानेपानी, भूमि व्यवस्था तथा वन तथा वातावरण मन्त्रालय रहेका छन्। यी मन्त्रालयहरू अन्य सम्बन्धित मन्त्रालयमा समावेश गरिनेछन् र एउटै मन्त्रीलाई दुईवटा जिम्मेवारी दिइनेछ।
भौतिक पूर्वाधार तथा यातायात मन्त्रालयसँग शहरी विकास मन्त्रालय गाभिने सम्भावना रहेको छ। त्यसैगरी शिक्षा मन्त्रालयसँग युवा तथा खेलकुद, स्वास्थ्य मन्त्रालयसँग खानेपानी र संघीय मामिला मन्त्रालयसँग भूमि व्यवस्था मन्त्रालय गाभिने तयारी गरिएको छ।
यस्तै कृषि तथा पशुपन्छी विकास मन्त्रालयसँग वन तथा वातावरण मन्त्रालय पनि समायोजन गरिने सम्भावना देखिएको छ।
हाल नेपालमा २१ मन्त्रालय रहेकोमा नयाँ संरचनाअनुसार मन्त्रालय संख्या घटेर करिब १६ हाराहारीमा पुग्ने अनुमान गरिएको छ।
यस सम्बन्धमा अन्तिम निर्णय मन्त्रिपरिषद् बैठकबाट हुनेछ। बैठकले कार्यविभाजन नियमावली संशोधन गरेपछि मन्त्रालय गाभिने प्रक्रिया औपचारिक रूपमा लागू हुनेछ।
