- • १. विराटनगर–१७ मा कल्भर्टमुनि तन्नाले बेरेको अवस्थामा भेटिएको महिलाको शव विराटनगर–१५ की कोमलकुमारी साहको भएको पुष्टि भएको छ।
- • २. प्रहरीका अनुसार श्रीमान् रोशन साहले श्रीमती हराएको भन्दै निवेदन दिएका थिए, तर अनुसन्धानमा उनीमाथि नै हत्या आरोप लागेको छ।
- • ३. प्रारम्भिक अनुसन्धानले घरायसी विवादपछि हत्या गरेर शव लुकाइएको देखाएको छ भने प्रहरीले विस्तृत अनुसन्धान जारी राखेको छ।
११ चैत, विराटनगर । विराटनगर महानगरपालिका–१७ मा कल्भर्टमुनि फेला परेको महिलाको शवको पहिचान खुलेको छ। प्रहरीका अनुसार उक्त शव विराटनगर–१५ की कोमलकुमारी साहको हो।
मंगलबार साँझ स्थानीयले कल्भर्टमुनि तन्नाले बेरेको अवस्थामा शव देखेपछि जनप्रतिनिधिमार्फत प्रहरीलाई खबर गरेका थिए। त्यसपछि प्रहरी टोली घटनास्थल पुगेर शव नियन्त्रणमा लिई पोस्टमार्टमका लागि कोशी अस्पताल पठाएको थियो।
जिल्ला प्रहरी कार्यालय मोरङका डीएसपी लिलाराज लामिछानेका अनुसार मृतकका श्रीमान् रोशन साहले केही दिनअघि श्रीमती हराएको भन्दै इलाका प्रहरी कार्यालय रानीमा निवेदन दिएका थिए। शवको हुलिया र हराएकी महिलाको विवरण मिलेसँगै प्रहरीले रोशनलाई नियन्त्रणमा लिएर अनुसन्धान अघि बढाएको हो।
प्रहरी स्रोतका अनुसार कोमलकुमारी चैत ६ गतेदेखि घरमा थिइनन्। त्यसको दुई दिनपछि चैत ८ गते रोशनले श्रीमती हराएको भन्दै हुलियासहित निवेदन दिएका थिए। तर निवेदन परेको दुई दिनमै मंगलबार बेलुका कल्भर्टमुनि शव फेला परेपछि घटनाले नयाँ मोड लिएको हो।
प्रारम्भिक अनुसन्धानबाट घरायसी विवादपछि रोशनले पत्नीको हत्या गरेर शव लुकाउने प्रयास गरेको आशंका गरिएको प्रहरीले जनाएको छ। शव भेटिएको स्थान मृतकको घरबाट करिब पाँच किलोमिटर टाढा रहेको बताइएको छ।
प्रहरीका अनुसार शव सडेको तथा दुर्गन्धित अवस्थामा रहेकाले सुरुमा पहिचान गर्न कठिन भएको थियो। तर हराएका व्यक्तिसम्बन्धी निवेदन अध्ययन गर्दा शवको हुलिया विवरणसँग मिलेको र त्यसपछि अनुसन्धानको दिशा स्पष्ट भएको हो।
डीएसपी लामिछानेले घटनाको विस्तृत अनुसन्धान भइरहेको जानकारी दिएका छन्। प्रहरीले अहिले घटनाको कारण, समय र संलग्नताको थप प्रमाण संकलन गरिरहेको छ।
