- • १. सोमबार सुनको मूल्य प्रतितोला ६ हजार ५ सय रुपैयाँले घटेर २ लाख ७५ हजार ५ सय रुपैयाँमा झरेको छ।
- • २. एक साताको अवधिमा सुनको भाउ कुल ३४ हजार रुपैयाँले घटेको छ।
- • ३. चाँदीको मूल्य पनि प्रतितोला ११५ रुपैयाँले घटेर ४ हजार ४२५ रुपैयाँमा कायम भएको छ।
९ चैत, काठमाडौं । सोमबार नेपाली बजारमा सुनको मूल्यमा उल्लेख्य गिरावट आएको छ। नेपाल सुनचाँदी व्यवसायी महासंघका अनुसार यस दिन सुन प्रतितोला ६ हजार ५ सय रुपैयाँले सस्तिएको हो।
अघिल्लो दिन प्रतितोला २ लाख ८२ हजार रुपैयाँमा कारोबार भएको सुन सोमबार घटेर २ लाख ७५ हजार ५ सय रुपैयाँमा कायम भएको छ। यसअघि पनि सुनको मूल्यमा तीव्र गिरावट देखिएको थियो। एक सातामै सुनको भाउ कुल ३४ हजार रुपैयाँले घटेको महासंघले जनाएको छ।
गत सोमबार सुन प्रतितोला ३ लाख ९ हजार ५ सय रुपैयाँमा कारोबार भएको थियो। यसअघि माघ १५ गते सुनको मूल्य हालसम्मकै उच्च बिन्दुमा पुगेको थियो। त्यतिबेला प्रतितोला ३ लाख ३९ हजार ३ सय रुपैयाँ कायम भएको रेकर्ड छ।
विशेषज्ञहरूका अनुसार पश्चिम एसियामा चर्किएको द्वन्द्वका कारण अन्तर्राष्ट्रिय बजारमा तेल महँगिएको छ। तेल खरिदका लागि अमेरिकी डलरको माग बढ्दा डलर पनि बलियो बनेको छ। यही दबाबका कारण सुन बिक्री बढ्न गई यसको मूल्यमा गिरावट आएको अन्तर्राष्ट्रिय सञ्चारमाध्यमहरूले जनाएका छन्।
तेलको मूल्यवृद्धिसँगै विश्वव्यापी मुद्रास्फीति बढ्ने चिन्ता पनि देखिएको छ। त्यसले विभिन्न देशका केन्द्रीय बैंकमाथि ब्याजदर बढाउने दबाब सिर्जना गरेको छ। ब्याजदरमा यस्तो दबाब परेपछि सुनचाँदीजस्ता बहुमूल्य धातुको मूल्यमा असर परेको विश्लेषण गरिएको छ।
यता चाँदीको मूल्य पनि सोमबार घटेको छ। अघिल्लो दिन प्रतितोला ४ हजार ५४० रुपैयाँमा कारोबार भएको चाँदी यस दिन ११५ रुपैयाँले घटेर ४ हजार ४२५ रुपैयाँमा झरेको छ।
