५ चैत, धनगढी । कैलालीमा एक युवकले श्रीमतीको गोली हानी हत्या गरेका छन्।
गोदावरी नगरपालिका–४ अमलेशैनी गाउँका करिब ३१ वर्षीय रामबहादुर मगरले जंगलमा बाख्रा चराउन गएका बेला २८ वर्षीया श्रीमती संजिता मगरको हत्या गरेको प्रहरीले जनाएको छ।
जिल्ला प्रहरी कार्यालय कैलालीका निमित्त प्रमुख प्रहरी नायब उपरीक्षक योगेन्द्र तिमिल्सिनाका अनुसार दम्पतीबीच विवाद भएपछि रामबहादुरले आफूसँग रहेको भरुवा बन्दुक प्रयोग गरी श्रीमतीमाथि गोली प्रहार गरेका थिए।
घटनापछि उनले सोही बन्दुकले आफैंलाई पनि गोली हानेको प्रहरीले जनाएको छ। घाइते रामबहादुरको सेती प्रादेशिक अस्पतालमा उपचार भइरहेको छ।
मृतक संजिताको शव घटनास्थलमै राखिएको छ। प्रहरीले माइती पक्ष आएपछि शव उठाइने जनाएको छ।
घटनाबारे थप अनुसन्धान भइरहेको डीएसपी तिमिल्सिनाले जानकारी दिए।
