आठ महिना भित्र पोखरा विमानस्थल सञ्चालनमा ल्याउने मन्त्री आलेको भनाई

काठमाडाैं । संस्कृति, पर्यटन तथा नागरिक उडड्यनमन्त्री प्रेम आलेले आठ महिनाभित्र पोखरा अन्तर्राष्ट्रिय विमानस्थल सञ्चालनमा ल्याउने बताएका छन्। मन्त्री आलेले गौतमबुद्ध अन्तर्राष्ट्रिय विमानस्थलको १० दिनभित्र क्यालिब्रेसन फ्लाइट गर्ने जानकारीसमेत दिए। शुक्रबार काठमाडौंमा आयोजित वायु सेवा सञ्चालक संघ, नेपालको २१औँ वार्षिक साधारणसभामा बोल्दै उनले  व्यवसायीहरूको योगदानकै कारण नेपालको विमानस्थललगायतका हवाई उडानको क्षेत्रले प्रगति गर्दै गएको पनि स्मरण गराए। मन्त्री आलेले भने, ‘हामी करिब ७ देखि ८ महिनाको बीचमा पोखरा अन्तर्राष्ट्रिय विमानस्थलमा क्यालिब्रेसन फ्लाइट गरेर छिट्टै सञ्चालनमा ल्याउने तयारी गरिरहेका छौँ। त्यति मात्रै नभएर गौतमबुद्ध अन्तर्राष्ट्रिय विमानस्थलमा मलाई लाग्छ, हप्ता, १० दिनभित्र क्यालिब्रेसन फ्लाइट गर्दै छौँ । त्यसलाई पनि छिट्टै सञ्चालनमा ल्याउँदै छौ्ँ। आज यहाँ आएर भनिरहँदा यो जुन व्यवसायमा आदरणीय आवद्ध व्यक्तित्वहरू हुनुहुन्छ। हजारौँलाई रोजगार सिर्जना गर्नुभएको छ। यो राज्यले गर्न सक्नेभन्दा बढी योगदान यहाँहरूले दिनुभएको छ। यसका लागि हार्दिक धन्यवाद दिन चाहन्छु।’ मन्त्री आलेले हवाई उडानको क्षेत्रमा काम गर्ने व्यवसायीहरूले हजारौँ नागरिकलाई रोजगारीको अवसर दिएर राज्यले भन्दा बढी काम गरेको भन्दै प्रशंसा पनि गरे। कार्यक्रममा संघका पुनः निर्वाचित अध्यक्ष क्याप्टेन रामेश्वर थापाले अग्रजहरूको योगदानकै कारण नेपालको हवाई उडानको क्षेत्रले प्रगति गर्न सम्भव भएको बताए । उनले हप्ता दिनसम्म पनि हवाई उडान भर्नका लागि टिकट पाउने नसक्ने पीडाबाट मुक्ति दिलाउने सफलता आजको दिनमा मिलेको पनि बताए। कार्यक्रममा हवाई उडानको क्षेत्रका योगदान दिएका व्यक्ति तथा संस्थाहरूलाई सम्मान गरिएको थियो। स्रोतः नयाँ पत्रिका