सुरक्षा प्रणाली र भन्सार प्रशासन सुन तस्करीमा प्रत्यक्ष जोडिनु गम्भीर विषय: एमाले महासचिव पोखरेल

काठमाडौं । नेकपा एमालेका महासचिव शंकर पोखरेलले सुन तस्करीमा दलका जिम्मेवार नेताहरुको नाम मुछिनु राष्ट्रलाई नै लज्जित बनाउने विषय भएको टिपप्णी गर्नु भएको छ । सामाजिक सञ्जाल फेसबुकमा स्टाटस लेख्दै उहाँले सुन तस्करीमा सरकारको नेतृत्व गरिरहेका दलका जिम्मेवार नेताहरुको नाम समेत मुछिनुले स्थिति निकै गम्भीर देखिएको जनाउनु भएको हो । महासचिव पोखरेलले राष्ट्रलाई नै लज्जित बनाउने यस्ता घटनामा जनप्रतिनिधिमुलुक निकाय प्रतिनिधिसभाको ध्यान गम्भीररुपमा जान आवश्यक रहेको प्रष्ट पार्नु भएको छ । एअरपोर्ट जस्तो संवेदनशील ठाउँको सुरक्षा प्रणाली र भन्सार प्रशासन समेत तस्करीमा प्रत्यक्ष जोडिएको देखिनु गम्भीर विषय भएको महासचिव पोखरेलको भनाइ छ । महासचिव पोखरेलले सामाजिक सञ्जाल फेसबुकमा लेख्नु भएको छ,’ दिनहुँ सुन तस्करीका समाचारहरु आईरहेका छन् । सुन तस्करीमा सडक मात्र होइन हवाई मार्गको समेत प्रयोग भईरहेको छ । केही दिन अघि इलेक्ट्रिक सिग्रेटमा लुकाई ल्याएको सुनलाई मिलोमतोमा छुट्टाउने प्रयास भएको समाचार सार्वजनिक भएको थियो । हिजो त एअरपोर्टको सुरक्षा प्रणालीलाई पार गरेर वाहिरिएको एकक्विन्टल सुन समातिएको छ। ‘