पूर्वसभामुखका छोरा राहुल महरा पक्राउ परेसँगै सुन प्रकरणले नयाँ मोड लिँदै

काठमाडौं । विद्युतीय सिगरेट (भेप) मार्फत भएको ९ किलो सुन तस्करी प्रकरणले नयाँ मोड लिएको छ । प्रहरीको केन्द्रीय अनुसन्धान ब्युरो (सीआईबी)ले भेप प्रकरणमा जोडिएका माओवादी उपाध्यक्ष तथा पूर्वसभामुख कृष्णबहादुर महराका छोरा राहुल पक्राउ गरेसँगै सो प्रकरणले नयाँ मोड लिएको हो । भेपमार्फत ९ किलो सुन तस्करी गर्ने समूहका आरोपी दाओजिन वाङसँग राहुल महराको १९५ पटक सम्पर्क भएको देखिएको सीआईबीको अनुसन्धानले खुलाएको थियो । जसमा राहुलले १३१ र वाङले ३४ पटक फोन गरेको सीआईबीले निकालेको वाङको सीडिआर रेकर्डमा देखिएको थियो । त्यो बाहेक राहुलसँगै अर्को आरोपी चिनियाँ नागरिक असिमसँग पनि तीन पटक सम्पर्क भएको देखिएको थियो । भेप प्रकरणमा जोडिएका चिनियाँ नागरिक वाङ, असिम र लुई हान तीनै जनाले नेपाल छाडिसकेका छन् । भेप प्रकरणमा जोडिएका वाङ र ६० किलो सुन तस्करी आरोपमा पक्राउ परेका तिब्बती मुलका बेल्जियम नागरिक दावा छिरिङकोसमेत सम्पर्क देखिएको छ । जसकारण राहुल पक्राउ परेको सीआईबी स्रोतको भनाइ छ । यस्तो थियो घटना १० पुुस २०७९ मा चिनियाँ नागरिक ली हानसोङले फ्लाई दुबईको उडानबाट इलेक्ट्रिक सिगरेट ९भेप० ल्याएका थिए । ७३ वटा बट्टामा ल्याइएको ७३० थान भेपमा ९ किलो सुन लुकाएर ल्याएका थिए । उक्त भेप त्रिभुवन विमानस्थलमा जाँचका क्रममा ठूलो मात्रामा देखिएपछि भन्सार कार्यालयले रोक्यो । भन्सार कार्यालयलाई समेत भेपभित्र सुन लुकाएर ल्याएकोबारे जानकारी थिएन । जसकारण सामान करिब डेढ महिना भन्सारको गोदाममै थन्कियो । उक्त सामान गोदाममा हुँदा राहुलले चासो राखेका थिए । तर, उनको प्रयास सफल नभएपछि भन्सारकै कर्मचारीको सेटिङमा बजारबाट किनेर ल्याएर अर्को भेप भन्सारको गोदाममा राखेर सुन भएको भेप बाहिर बिक्री गरेको खुलेको थियो । उक्त भेपबारे गिरोहको सक्रियता शंकास्पद देखेपछि भन्सार प्रमुख अरुण पोखरेलले थप सोधपुछ र अनुसन्धान गर्दा त्यसमा सुन लुकाएर ल्याइएको नयाँ तथ्य खुलेको थियो । सोही अनुसन्धानबाट कर्मचारीकै संलग्नतामा सुन भएको भेप चोरी गरेर गोदाममा अर्को भेप राखेको खुलेको थियो । सो घटनापछि मात्रै पोखरेलले यसमा अनुसन्धान गर्न सीआईबीलाई पत्राचार गरेका थिए । ब्युरोको अनुसन्धानपछि मात्रै यो प्रकरणमा चिनियाँ गिरोहले भेपका नाममा सुन तस्करी गर्ने गरेको खुलाएको हो । जसमा महराका बाबु–छोरासमेत मुछिएका छन् । सुन भएको भेप भन्सारले नियन्त्रणमा लिएपछि भेपसँगै नेपाल आएका ली १३ पुसमा नेपाल छोडेको खुलेको छ । हाल सुन तस्करी प्रकरणभन्दा पनि भेप चोरी प्रकरणमा जोडिएका विमानस्थल भन्सारका नासु रेवन्त खड्कासहित सुरक्षा गार्ड निर्मलकुमार विक, भन्सार एजेन्ट दिनेश बस्नेत, व्यापारी वेदप्रकाश अग्रवाल र साहेवराव पाण्डुरङ मरगलेलाई जिल्ला अदालत काठमाडौंले पुर्पक्षको लागि जेल चलान गरेको छ । चोरी प्रकरणमै जोडिएका दिपेश बस्नेत, गोपाल सुवेदी र रामकेशव थापा भने हाल फरार छन् ।स्रोत : बाह्खरी