सुनसरी । नेपाल कम्युनिस्ट पार्टी एमाले बराहक्षेत्र नगर कमिटिले सामुदायिक विद्यालयमा अध्ययनरत विद्यार्थीहरु सहित बिपन्न मुसहर बस्तिका परिवारलाई जाडोको लागि न्यानो कपडा वितरण गरेको छ ।
बराहक्षेत्र ७ मा रहेको हनुमानझोडा आधारभूत विद्यालयमा अध्ययनरत दलित तथा मुसहर बस्तिका ९६ जना विद्यार्थीहरुलाई जाडोको लागि न्यानो कपडा वितरण गरेको हो। त्यस्तै विद्यालय क्षेत्र आसपास रहेका मुसहर र दलित बस्तिका बिपन्न र निम्न आय भएका ७२ जना ब्यक्तिहरु सहित कुल १ सय ६८ थान जाडोको लागि न्यानो कपडा वितरण गरेको नेकपा एमाले युवा नेता विवेक श्रेष्ठ ले जानकारी दिए ।
न्यानो कपडा वितरणको लागि विद्यालयको प्राङ्गणमा आयोजित औपचारिक कार्यक्रमका प्रमुख अतिथि नेकपा एमाले केन्द्रिय सदस्य जगदिस कुसियतले आफ्नो पार्टीले बिगतदेखि नै सामुदायिक विद्यालयहरुमा अध्ययनरत विद्यार्थीहरुको लागि छात्रवृत्ति, स्टेसनरी सामाग्री तथा जाडोको लागि न्यानो कपडा वितरण गर्दै आइरहेको बताउँदै बराहक्षेत्र ७ को मुसहर तथा दलित बस्तिको बिचमा रहेको विद्यालयमा अध्ययनरत विद्यार्थीहरु अधिकाँश गरिब तथा बिपन्न परिवारबाट अध्ययनका लागि आउने हुँदा विद्यालयमा अध्ययनरत सम्पूर्ण विद्यार्थी तथा यस क्षेत्रका बिपन्न परिवारलाई जाडोको लागि कपडा वितरण गरिएको बताए । साथै उनले न्यानो कपडा वितरण कुनै राजनैतिक उदेश्यको लागि गरिएको नभैइ मानवीय सहयोग गर्ने पार्टीको नीति र सिद्धान्त अनुरुप सहयोग गरिएको बताए ।
हनुमानझोडा आधारभूत विद्यालयका विद्यालय व्यवस्थापन समितिका सदस्य तथा वडा नम्बर ७ का वडा सदस्य धन बहादुर तामाङको अनुरोधमा नेकपा एमाले बराहक्षेत्रले आन्तरिक रुपमा सहयोग उठाएर यहाँको विद्यालय तथा दलित बस्तीमा जाडोको लागि न्यानो कपडा वितरण गरेको नेकपा एमाले जिल्ला सदस्य रुद्र दाहालले बताए ।
नेकपा एमाले बराहक्षेत्रले गरेको न्यानो कपडा वितरण कार्यक्रममा केन्द्रिय सदस्य जगदीश कुसियत, क्षेत्रीय कमिटी सचीव हरि बहादुर पौडेल, जिल्ला सदस्य रुद्र दाहाल, नगर अध्यक्ष सीता भन्डारी पौडेल, बराहक्षेत्र नगरपालिका उपप्रमुख नन्दकुमारी सुनुवार, स्थानीय युवा नेता अमृत भुजेल, मनोज कटुवाल, पाण्डव राई, १ नम्बर वडा अध्यक्ष किसन थापा, २ नम्बर वडा अध्यक्ष होम प्रसाद गौतम लगायत विद्यार्थी, शिक्षक र स्थानीयहरुको सहभागीता रहेको थियो ।