सुमन रायमाझी। २७ वैशाख, सप्तरी ।    सप्तरीको सप्तकोशी नगरपालिका स्थित फत्तेपुर बजारमा रहेको नेपाल बैंकका सुरक्षाकर्मी लुटेरासँगको प्रतिकारमा मारिएका छन् । नकाबधारीसँग १ घण्टा भन्दा अधिक प्रतिकार गरेपछि वडा नं. २ पर्सा घर भएका सुरक्षाकर्मी परशुराम फुयालको मृत्यु भएको प्रहरीको अनुमान छ ।

मध्य राती एक नकाबधारी बैक भित्र प्रवेश गरेको र विहानीपख बाहिरिएको सिसिटिभि फुटेजमा देखिएको छ । त्यस अन्तरालमा बैंक लुट्ने नियत राखेर आएका नकाबधारी र सुरक्षाकर्मीबिच निकै लामो भिडन्त भएको देखिएको छ । सुरक्षाकर्मी मारिएपछि लुटेरा बैँक भित्र प्रवेश गरेको र बैकको लकर काट्ने प्रयास गरेको प्रारम्भिक अनुसन्धानमा देखिएको छ । बैँकमा भएकाे क्षतिबारे भने अनुसन्धान भइरहेकाे प्रहरीले जनाएकाे छ ।

प्रवेशद्वारमा रगत लतपतिएको र दोहोरो झडपपछि नकाबधारीले खुकुरी राखेको फुटेजमा देखिएको स्थानीय मान प्रसाद लुईटेलले जानकारी दिनुभयो । फुटेजमा एउटै व्यक्ति पटक पटक भित्र बाहिर गरेको र फरक पोसाकमा प्रवेश गरेको देखिएको प्रहरीले जनाएको छ। बैंक हाल सिल गरिएको छ। घटनाको अनुसन्धान भइरहेको जिल्ला प्रहरी कार्यालय सप्तरीका डिएसपी एवम् प्रवक्ता ढुंडीराज न्यौपानेले बताउनुभयाे।