नेकपा एमालेका अध्यक्ष केपी शर्मा ओलीले महाशिवरात्रिलाई उपवास, जागरण र अन्तर्मनसँग संवाद गर्ने पर्वका रूपमा व्याख्या गरेका छन्।
महाशिवरात्रि पर्वको अवसरमा सामाजिक सञ्जाल फेसबुकमार्फत शुभकामना सन्देश दिँदै अध्यक्ष ओलीले पशुपतिनाथले ऊर्जाको तेजमय प्रवाहलाई संयममा राख्ने सामर्थ्य, विषको पीडा सहँदै पनि शान्त रहने धैर्य, र नश्वरता सम्झँदै अनासक्त जीवन जिउने सन्देश दिएको उल्लेख गरेका छन्।
उनले ‘पशु’ अर्थात् बन्धनमा बाँधिएको चेतनालाई मुक्त गराउने तथा लोभ, क्रोध, मोह र अहंकारबाट मनलाई निकालेर स्वतन्त्र, शान्त र आनन्दित बनाउने प्रतीकात्मक स्वरूप नै पशुपतिनाथ भएको बताएका छन्।
अध्यक्ष ओलीले सत्य बाहिरको कोलाहलमा होइन, भित्रको विवेकमा निहित रहने उल्लेख गर्दै महाशिवरात्रिको दिन सबैले विवेकको सत्य भेटून् र आत्मबोधको ज्योति प्रज्ज्वलित होस् भन्ने कामना गरेका छन्।
