विराटनगर | १८ फाल्गुन २०८२ (March 2, 2026), विराटनगरसहित देशभर आजदेखि लगातार सात दिन सार्वजनिक बिदा सुरु भएको छ। फागुपूर्णिमा (होली), प्रतिनिधिसभा निर्वाचन र अन्तर्राष्ट्रिय नारी दिवस एकै समय आसपास परेकाले यो लामो बिदा परेको हो।
सरकारले विभिन्न चाडपर्व र निर्वाचनलाई मध्यनजर गर्दै फागुन १८ गतेदेखि २४ गतेसम्म सरकारी कार्यालय, शैक्षिक संस्था तथा सार्वजनिक निकायहरू बन्द रहने जनाएको छ।
आज फागुन १८ गते पहाडी क्षेत्रहरूमा होलीको बिदा दिइएको छ भने भोलि फागुन १९ गते तराई क्षेत्रमा होली मनाइने भएकाले बिदा रहनेछ। यसपछि फागुन २१ गते हुने प्रतिनिधिसभा निर्वाचनलाई लक्षित गर्दै सरकारले फागुन २०, २१ र २२ गतेसम्म तीन दिन सार्वजनिक बिदा घोषणा गरेको छ।
निर्वाचनपछि फागुन २३ गते शनिबार परेको छ भने त्यसको भोलिपल्ट फागुन २४ गते अर्थात् ८ मार्चका दिन अन्तर्राष्ट्रिय नारी दिवसका अवसरमा पनि सार्वजनिक बिदा दिइएको छ।
यसरी होली, निर्वाचन र नारी दिवसको बिदा जोडिँदा आजदेखि अर्को हप्तासम्म लगातार सात दिन लामो सार्वजनिक बिदा परेको हो।
यो अवधिमा सरकारी सेवा, बैंक तथा शैक्षिक गतिविधिहरू प्रभावित हुने भए पनि सर्वसाधारणले भने लामो बिदाको अवसरलाई विभिन्न तरिकाले उपयोग गर्ने तयारी गरेका छन्।
