मोरङमा रास्वपाबाट चुनाव लड्न चाहनेको चासो बढ्दो

विराटनगर — २०७९ सालको निर्वाचनपछि राजनीतिको केन्द्रमा आएको राष्ट्रिय स्वतन्त्र पार्टी (रास्वपा) बाट उम्मेद्वार बन्न चाहनेहरूको चासो मोरङमा उल्लेखनीय रूपमा बढेको छ। हालसम्म जिल्लाका विभिन्न निर्वाचन क्षेत्रबाट १६ जनाले उम्मेद्वारीका लागि निवेदन बुझाइसकेको रास्वपा मोरङका कोषाध्यक्ष सन्तोष सिंहले जानकारी दिए।

उनका अनुसार मोरङ निर्वाचन क्षेत्र नम्बर १ र २ बाट समान रूपमा तीन–तीन जनाले आवेदन दिएका छन्। क्षेत्र नम्बर ३ बाट सुनिलदत्त अधिकारीसहित तीन जनाको निवेदन परिसकेको छ भने थप तीन जना आवेदन दिने तयारीमा छन्। यस्तै, क्षेत्र नम्बर ४ बाट तेजलाल कर्णसहित तीन जनाले निवेदन बुझाएका छन् भने दुई जना प्रक्रियामा छन्। क्षेत्र नम्बर ५ बाट दुई जनाले निवेदन दिएका छन् भने क्षेत्र नम्बर ६ बाट यादव प्रधान र गुनानन्द महतो गरी दुई जनाले उम्मेद्वारीका लागि आवेदन दिएका छन्।

‘अहिलेसम्म आवेदन आउने क्रम रोकिएको छैन,’ सिंहले भने, ‘अझै दुई दिन समय बाँकी रहेकाले उम्मेद्वारको संख्या थप बढ्न सक्छ।’

यसैबीच, रास्वपा कोशी प्रदेश संयोजक सरिन तामाङले पार्टीको उम्मेद्वार छनोट प्रक्रिया पुराना दलको जस्तो नभएको स्पष्ट पारिन्। उनका अनुसार पार्टीमा अन्तिम उम्मेद्वार ‘प्राइमरी निर्वाचन’ बाट तय गरिनेछ।

‘अनलाइन फारम भरेपछि यदि कुनै क्षेत्रमा एक जनामात्रै उम्मेद्वार भए भने प्राइमरी आवश्यक पर्दैन,’ तामाङले भनिन्, ‘तर दुई वा सोभन्दा बढी आकांक्षी भएमा प्रारम्भिक निर्वाचनमा सहभागी हुनैपर्छ भन्ने व्यवस्था हाम्रो कार्यविधिमा छ।’

पार्टीले समानुपातिक उम्मेद्वारका लागि ५० हजार रुपैयाँ र प्रत्यक्षतर्फ उम्मेद्वार बन्न २५ हजार रुपैयाँ दर्ता शुल्क निर्धारण गरेको छ। यद्यपि आर्थिक रूपमा कमजोर तर समाज र देशका लागि योगदान पुर्‍याएका व्यक्तिलाई भने शुल्कमा छुटको व्यवस्था गरिएको तामाङले बताइन्।

‘यदि सक्षम र योगदानशील व्यक्ति राजनीतिमा आउन चाहन्छन् तर आर्थिक अवस्था कमजोर छ भने, स्थानीय तह वा वडा कार्यालयको सिफारिसका आधारमा दर्ता शुल्क नलाग्ने व्यवस्था पनि गरिएको छ,’ उनले भनिन्।