अमेरिकी राष्ट्रपति डोनल्ड ट्रम्पले  सुरक्षा खर्चका लागि ऐतिहासिक वृद्धि गर्ने घोषणा गरेका छन्।

ह्वाइट हाउसले पेन्टागनका लागि अहिलेको बजेटमा झण्डै १० प्रतिशत अर्थात् करिब ५४ अर्ब डलर वृद्धि गर्न ट्रम्पले चाहेको बताएको छ । उनले आफ्नो प्रशासनले अर्को महिना बजेटको पहिलो प्रस्ताव संसदमा पेश गर्ने बताए। राष्ट्रपति ट्रम्पले योजना गरेको बजेटलाई संसदले अनुमोदन गर्नुपर्नेछ। सन् २०१० यता घट्दै आइरहेको सुरक्षा बजेट अब ट्रम्पले बढाउन चाहेका छन्।

अमेरिकाले अहिले सुरक्षाका लागि वार्षिक ६ सय अर्ब डलर खर्च गरिरहेको छ। तर अब ट्रम्पले उक्त खर्चमा ५४ अर्ब डलर थप्न चाहिरहेका छन् जुन अहिलेको भन्दा करिब १० प्रतिशत बढी हो। पेन्टागनको बजेटमा यति रकम थपिँदा त्यो लगभग युद्धका बेला खर्च गरिने रकमको हाराहारी हुन आउँछ।