हर्क साम्पाङको कटाक्ष : बालेन्द्र शाह ‘फेसबुकमै सीमित प्रधानमन्त्री’

धरान — श्रम संस्कृति पार्टीका अध्यक्ष तथा धरान उपमहानगरपालिकाका प्रमुख हर्क साम्पाङ ले काठमाडौं महानगरपालिकाका मेयर बालेन्द्र शाह प्रति तीखो टिप्पणी गर्दै उनलाई ‘फेसबुके प्रधानमन्त्री’ को संज्ञा दिएका छन्।

इटहरीमा आयोजित एक सार्वजनिक सभालाई सम्बोधन गर्दै साम्पाङले देश गम्भीर संकटमा परेको समयमा जिम्मेवारीबाट पन्छिने व्यक्ति कुनै पनि हालतमा प्रधानमन्त्री बन्न योग्य नहुने धारणा राखे। सामाजिक सञ्जालमा सक्रिय देखिए पनि व्यवहारमा नेतृत्व देखाउन नसक्ने प्रवृत्तिमाथि उनले प्रश्न उठाए।

कार्यक्रमका क्रममा साम्पाङले राष्ट्रिय स्वतन्त्र पार्टीका सभापति रवि लामिछाने र नेपाल विद्युत् प्राधिकरणका कार्यकारी निर्देशक कुलमान घिसिङ लाई समेत लक्षित गरे। उनले ती नेताहरू विदेशी शक्तिको प्रभावमा काम गरिरहेको आरोप लगाउँदै, तीनैबीचको सहकार्यलाई ‘गाँठो बाँधिएको गठजोड’ को संज्ञा दिए। यस्तो सम्बन्धले देशलाई समृद्धितर्फ लैजान नसक्ने उनको दाबी थियो।

देशको वास्तविक विकासका लागि श्रम संस्कृतिको स्थापना अनिवार्य रहेको उल्लेख गर्दै साम्पाङले नीति निर्माण मात्र पर्याप्त नहुने बताए। “श्रम र जनताको प्रत्यक्ष सहभागिता बिना विकास सम्भव हुँदैन,” उनले भने। पार्टी संगठन विस्तार र चुनावी तयारी तीव्र बनाइएको उल्लेख गर्दै श्रम, माटो र जनतासँग जोडिएको अभियानमार्फत दिगो समृद्धि सम्भव हुने उनको भनाइ छ।

लोकतन्त्र, राष्ट्रियता र स्वाधीनताको संरक्षणका लागि सबै नागरिक सचेत र एकताबद्ध हुनुपर्नेमा उनले जोड दिए। आपसी सहकार्य र साझा प्रतिबद्धताबाट मात्रै मुलुकले समृद्धिको बाटो समात्न सक्ने साम्पाङको धारणा थियो।

देश अहिले गम्भीर संकटको अवस्थाबाट गुज्रिरहेको उल्लेख गर्दै उनले सबै पक्ष मिलेर पुनर्निर्माणको दिशामा लाग्नुपर्ने आवश्यकता औंल्याए। साथै, आगामी फागुनमा हुने निर्वाचन शान्त र भयरहित वातावरणमा सम्पन्न गर्न सरोकारवाला निकायले विशेष योजना र प्रभावकारी समन्वय गर्नुपर्नेमा उनले जोड दिए।