काठमाडौंमा महिला टी–२० विश्वकप ग्लोबल छनोट, नेपालसामु कडा चुनौती

२७ पुस, काठमाडौं — आगामी सातादेखि काठमाडौंमा आईसीसी महिला टी–२० विश्वकपको ग्लोबल छनोट प्रतियोगिता सुरु हुँदैछ। नेपालले पहिलोपटक आयोजना गर्न लागेको यसस्तरको ठूला अन्तर्राष्ट्रिय क्रिकेट प्रतियोगितामा आयोजक नेपालसहित १० राष्ट्र सहभागी हुनेछन्।

यस प्रतियोगिताबाट उत्कृष्ट चार टोलीले यसै वर्ष इंग्ल्यान्ड र वेल्समा आयोजना हुने महिला टी–२० विश्वकपमा स्थान सुरक्षित गर्नेछन्। प्रतियोगितामा जिम्बाबे, आयरल्यान्ड र बंगलादेशजस्ता तीन टेस्ट राष्ट्र पनि प्रतिस्पर्धामा छन्। बाँकी टोलीहरू नेपाल, स्कटल्यान्ड, नेदरल्यान्ड्स, नामिबिया, अमेरिका, पपुवा न्युगिनी (पीएनजी) र थाइल्यान्ड हुन्।

नेपाल समूह ‘बी’ मा परेको छ, जहाँ उसले स्कटल्यान्ड, नेदरल्यान्ड्स, थाइल्यान्ड र जिम्बाबेसँग प्रतिस्पर्धा गर्नेछ। यी चारवटै टोली टी–२०आई वरियतामा नेपालभन्दा माथि रहेका छन्। हाल नेपाल २१औँ स्थानमा छ।

नेपालले यसअघि थाइल्यान्ड र नेदरल्यान्ड्ससँग अन्तर्राष्ट्रिय खेल खेलेको अनुभव छ भने स्कटल्यान्ड र जिम्बाबेसँग भने यो पहिलो प्रतिस्पर्धा हुनेछ।

टोली र तयारी

प्रतियोगिताअघि नेपाली महिला टोलीको मुख्य प्रशिक्षकमा हर्षल जयन्त पाठक नियुक्त भएका छन्। उनले घरेलु मैदानको फाइदा र खेलाडीहरूको क्षमतामा विश्वास गर्दै विश्वकपमा छनोट हुने सम्भावना देखिएको बताएका छन्।

“चुनौती पक्कै छ, तर यो टिमसँग क्षमता पनि छ। खेलाडीहरू उत्साहित छन् र योजना अनुसार खेल्न तयार छन्,” प्रशिक्षक पाठकले भने।

कप्तान इन्दु बर्माले पनि टोलीले छनोटलाई लक्ष्य बनाएर गम्भीर तयारी गरिरहेको बताइन्। “प्रतिद्वन्द्वी बलिया भए पनि खेलको दिन हामीले उत्कृष्ट प्रदर्शन गर्नुपर्छ भन्ने मानसिकतामा छौँ,” उनले भनिन्।

समूह ‘बी’ का विपक्षी टोली

थाइल्यान्ड

थाइल्यान्ड नेपालका लागि परिचित प्रतिद्वन्द्वी हो। हालसम्म नेपालले थाइल्यान्डसँग सातवटा टी–२०आई खेल खेलेको छ र सबैमा पराजित भएको छ। थाइल्यान्डले २०२० मा अस्ट्रेलियामा भएको महिला टी–२० विश्वकप खेलेको अनुभव पनि राख्छ। महिला टी–२०आई वरियतामा थाइल्यान्ड १२औँ स्थानमा छ।

स्कटल्यान्ड

स्कटल्यान्ड एसोसियट टोलीहरूमध्ये सबैभन्दा माथिल्लो वरियतामा रहेको टोली हो। हाल टी–२०आई वरियतामा ११औँ स्थानमा रहेको स्कटल्यान्डले सन् २०२४ को महिला टी–२० विश्वकप पनि खेलेको थियो। नेपालसँग भने स्कटल्यान्डको यो पहिलो आधिकारिक टी–२०आई भेट हुनेछ।

नेदरल्यान्ड्स

नेदरल्यान्ड्स महिला टोली टी–२०आई वरियतामा १४औँ स्थानमा छ। हालसम्म टी–२० विश्वकप नखेलेको यो टोलीसँग नेपालले तीन पटक खेलेको छ र तीनै खेलमा पराजित भएको छ। नेदरल्यान्ड्सले युरोपियन छनोटको उपविजेता बनेर ग्लोबल छनोटमा स्थान बनाएको हो।

जिम्बाबे

१५औँ वरियतामा रहेको जिम्बाबेले पनि टी–२० विश्वकप खेलेको छैन। अफ्रिकी छनोट पार गरेर काठमाडौं आइपुगेको जिम्बाबे महिला टोलीसँग नेपालले अहिलेसम्म अन्तर्राष्ट्रिय खेल खेलेको छैन। जिम्बाबेले सन् २०२३ को अफ्रिकन गेम्समा क्रिकेटतर्फ स्वर्ण पदक जितेको थियो।

समूह ‘ए’ को सम्भावित चुनौती

यदि नेपाल समूह चरण पार गर्दै अगाडि बढेमा समूह ‘ए’ का टोलीहरूसँग खेल्नुपर्नेछ। समूह ‘ए’ मा बंगलादेश, आयरल्यान्ड, नामिबिया, अमेरिका र पपुवा न्युगिनी छन्।

नेपालले बंगलादेशसँग सन् २०१९ मा पोखरामा खेलेको एकमात्र खेल गुमाएको थियो। नामिबियासँग युगान्डामा भएको शृंखलाका दुई खेलमा पनि नेपाल पराजित भएको थियो। आयरल्यान्डसँग भने छनोटअघि वार्म–अप खेल खेलिनेछ, जसलाई अन्तर्राष्ट्रिय मान्यता दिइने छैन।