१० फागुन, काठमाडौं। नेकपा एमालेका अध्यक्ष केपी शर्मा ओलीले राज्यको ठूलो आर्थिक लगानी भइसकेकाले अब निर्धारित समयमै निर्वाचन सम्पन्न हुनुपर्ने बताएका छन्। चुनाव स्थगित गर्ने प्रयास भइरहेको दाबी गर्दै उनले एमाले कुनै पनि प्रकारको अन्योलमा नपरी निर्वाचन जित्ने तयारीमा जुटिसकेको स्पष्ट पारे।
अध्यक्ष ओलीले देशव्यापी निर्वाचन तयारीका क्रममा राज्य तथा उम्मेदवारहरूले अर्बौं रुपैयाँ खर्च गरिसकेको उल्लेख गर्दै अब चुनाव नहुने भन्ने चर्चा उचित नभएको बताए। उनका अनुसार निर्वाचनलाई रोक्ने वा स्थगित गर्ने प्रयास लोकतान्त्रिक अभ्यासको विपरीत हुनेछ।
“हामी स्पष्ट रूपमा चुनाव होस् भन्ने पक्षमा छौं। अहिले पनि चुनाव स्थगित हुन सक्छ भन्ने कुरा चलिरहेको छ। विभिन्न प्रयासहरू भइरहेका छन् भन्ने सुनिन्छ। तर जे भए पनि हामी अलमलमा पर्दैनौं। हामी चुनावको तयारीमा लागिसकेका छौं र विजय हासिल गर्ने लक्ष्यसहित अघि बढिरहेका छौं,” ओलीले भने।
उनले एमाले कार्यकर्तालाई कुनै भ्रममा नपर्न आग्रह गर्दै चुनावी अभियानलाई तीव्र बनाउन निर्देशन दिए। “अब हामीले कुनै अलमल गर्नु हुँदैन। हाम्रो लक्ष्य स्पष्ट छ—निर्वाचन जित्ने। त्यसका लागि हामी पूर्ण तयारीमा छौं,” उनले जोड दिए।
अध्यक्ष ओलीले विगत ६ महिनादेखि निर्वाचन सुनिश्चित गर्न आफूहरूले पहल गरेको तर त्यसतर्फ पर्याप्त ध्यान नदिएको आरोप लगाए। “छ महिनासम्म हामीले चुनावका लागि पहल गर्यौं। तर त्यसबेला कसैले चासो देखाएन। अहिले अन्तिम समयमा आएर चुनाव हुँदैन भन्नु गलत हो,” उनले भने।
उनले निर्वाचनको तयारीमा राज्यको ठूलो धनराशी खर्च भइसकेको स्मरण गराउँदै थप विलम्बले देशलाई आर्थिक रूपमा समेत असर पर्ने बताए। “देशको अर्बौं रुपैयाँ खर्च भइसकेको छ। उम्मेदवारहरूले पनि ठूलो खर्च गरिसकेका छन्। अब चुनाव नहुने भन्नु उचित होइन,” ओलीको भनाइ थियो।
उनले निर्वाचन स्थगित गर्ने प्रयासहरूलाई अप्रत्यक्ष रूपमा संकेत गर्दै लोकतान्त्रिक प्रक्रियालाई कमजोर पार्ने गतिविधिहरूप्रति सचेत रहन आग्रह गरे। “लोकतन्त्रमा चुनाव नै प्रमुख माध्यम हो। त्यसलाई रोक्ने वा अनिश्चित बनाउने प्रयास देशहितमा हुँदैन,” उनले भने।
सै क्रममा अध्यक्ष ओलीले राष्ट्रिय स्वतन्त्र पार्टीप्रति लक्षित टिप्पणी पनि गरे। उनले कुनै स्पष्ट आधारबिना उग्र गतिविधिमा संलग्न रहेको आरोप लगाउँदै ‘जोडजामवाला पार्टी’ को संज्ञा दिए। “सानो भाँडोमा दुध उमालेर तलबाट चर्को आगो बालिदिएजस्तो गरी केही पार्टीहरू अत्यधिक उम्लिएका छन्। तर त्यो दीर्घकालीन आधारमा टिक्दैन,” उनले टिप्पणी गरे।
ओलीले विपक्षी दलले वातावरण बिथोल्ने र अन्य दलको झण्डा जलाउनेजस्ता गतिविधि सुरु गरेको आरोप लगाए। “जित्ने सम्भावना कम देखिएपछि अरूको झण्डा जलाउने, निहुँ खोज्ने, अपमान गर्ने जस्ता क्रियाकलापमा लाग्नु राम्रो संकेत होइन,” उनले भने।
अध्यक्ष ओलीले एमाले शान्तिपूर्ण, लोकतान्त्रिक र प्रतिस्पर्धात्मक वातावरणमा निर्वाचन सम्पन्न गराउने पक्षमा रहेको उल्लेख गर्दै कुनै पनि उक्साहटमा नपर्न कार्यकर्तालाई आग्रह गरे। “हामी शान्तिपूर्ण र मर्यादित चुनाव चाहन्छौं। उक्साहटमा नपरी जनताको बीचमा आफ्ना एजेन्डा लिएर जानुपर्छ,” उनले भने।
राजनीतिक विश्लेषकहरूका अनुसार निर्वाचन स्थगनको चर्चा भइरहेका बेला एमाले नेतृत्वले स्पष्ट रूपमा चुनाव पक्षमा उभिएर आफ्ना कार्यकर्तामा उत्साह भर्ने प्रयास गरेको देखिन्छ। अबको दिनमा निर्वाचन सम्बन्धी निर्णय र राजनीतिक दलहरूको गतिविधिले देशको राजनीतिक दिशालाई निर्धारण गर्ने अपेक्षा गरिएको छ।
